[amdavadis4ever] છેલ્લો આંટો

 

Please use http://translate.google.com/ to translate this article to Language of your choice. છેલ્લો આંટો શમણાંની મોસમ : દેવેન્દ્ર પટેલ દૂર દૂર પિૃમમાં સૂર્ય ડૂબું ડૂબું થઈ રહ્યો હતો. સંધ્યાની લાલિમામાં શોભતી પ્રકૃતિએ જાણે કે કેસરી વાઘા ધારણ કર્યા હતા. આખોય દિવસ દોડી દોડીને થાકેલા પવનના પગ પણ હવે થંભી ગયા હતા.   ઝાડના થડ સાથે બાંધેલા બળદને છોડી જગતાએ ગાડે જોડયા. ગાડામાં ઉપાડી નાંખેલા કપાસનાં ઝૈડાંનો ભોર ભર્યો હતો. ઘૂંસરીએ બેસીને રાસ હાથમાં લીધી.   'હેંડો ભઈલા' ડચકારો કરતાં શીંગડાં હલાવતાં બળદોએ પગ ઉપાડયા....અને એમને ગળે બાંધેલાં ટોકરીનાં રણકારથી સંધ્યા જાણે કે સલૂણી બની રહી.   ખેતરની ગાડાવાટને પૂરી કરીને ગાડું હવે એક સીધા ઢાળ નજીક આવ્યું એટલે જગતાએ રાસ ખેંચી, હોઠ ભીડી ફરી ડચકારો કર્યોઃ 'ઘેંમે ભાઈલા, ઘેંમે.'   'એ જરા હાચવીને...જગતા....!'   કોઈ બૈરા મનેખનો અને વળી પાછો જાણકાર આવાજ સાંભળીને જગતો વિચારમાં પડી ગયો. તેણે આજુબાજુ નજર કરી પણ કયાંય કોઈ દેખાયું નહીં; ગાડામાં ભોર ભરેલો હોઈ પાછળ તો જોઈ શકાય એમ નહોતું એટલે તેણે બૂમ મારીઃ 'કુણ છે લ્યા!'   પ્રત્યુત્તરમાં માત્ર ખડખડાટ હસવાનો અવાજ આવ્યો...પણ અવાજની દિશા તે પરખી ગયો. તે જાણી ગયો કે કોક એના ભોર પર બેઠું છે.   'જોગણીની જેમ દાંત કાઢયા વગર નેંચે ઊતર, નકર...' અકળાયેલા જગતાએ આખરીનામું આપ્યું.   'નકર હું કરે!...જા નથી ઊતરતાં, તારાથી થાય એ કરી લે.' ઉપરથી આવેલા અવાજ સાથે જગતાના માથે એક ઝૈડું પણ પડયું.   'કુણ...જીવી!': અવાજ પારખી ગયો હોય એમ જગતાએ મલકાતાં મલકાતાં પૂછયુ.ં   'હંમ...ઓળખાણ પડે છે ની...જગત! તારું તો કાંય ઠેકાણું છે લ્યા?'   ઝૈડાંના બદલે છોડીઓનો ભોર ભરીને હેંડવા માંડયો છે તે! ઉપરથી જીવીએ હસતાં હસતાં કહ્યું.   અને ઢાળ ઉપરથી દોડી રહેલું ગાડું સડસડાટ નીચે ઊતરી આવ્યું. ઘડીભર માટે ટોકરીના દૂર રણકી ઊઠેલા અવાજના પડઘા ધીમા થઈ ગયા અને હાંફતા બળદને ઊભા રાખી જગતો બોલ્યોઃ   '....હવે નીચે ઊતર.....કોઈ તને મારા ગાલ્લામાં જોશે તો વળી પાછી ભવઈ...હાંભળ્યું!'   જીવીએ ભોર પરથી સીધો જ નીચે ભૂસકો માર્યો અને ઘેરદાર ઘાઘરીને ખંખેરતી ગાડાની સામે આવીને ઊભી રહીં.   ગાડાના ઊંટાડે હાથ મૂકીને આંખો નચાવતી જીવીએ જગતાના હાથમાંથી સાટકો (બળદના હાંકવા માટેનું સાધન) પકડી લેતાં કહ્યું: 'એવો તે અમે શો ગનો કર્યો છે કે કદી જીવીને તમે હંભારતાય નથી?'   જીવીની આંખોમાં આંખો પરોવતાં જગતાએ કહ્યું, 'ગનો!...ગનો તો જીવી. ઉપરવાળાનો હોય ઈમ લાગે સે...બધો ખેલ ઈનો જ છ..કને ખબર હતી કે....'   જીવીથી આગળ સાંભળવાની તાકાત ના હોય એમ તેણે મોં નીચું ઢાળી દીધું અને જગતાએ પણ વાક્ય અધૂરું છોડી દીધું:   થોડીવાર બંને ચૂપ ઊભાં રહ્યાં. જીવી હજુ નીચું જ જોઈ રહી હતી અને જગતો એકીટસે જીવીના મોંના ભાવને પારખવા મથી રહ્યો. કાંધ વગર ગાડાનો બોજ લઈને ઊભેલા એક બળદે શીંગડાં હલાવ્યાં અને ફરી પાછા એ ટોકરીના રણકારથી બંને જણે એકબીજા સામે જોયું.   જીવી કોઈ અગમ્ય લાગણીનો ધોધ વહેવડાવતી જગતા સામે જોઈ રહી, જાણે કે....   અને જગતો બોલ્યોઃ 'હરણિયું માથે આવ્યે તારી વાટ જોઈશ..વંડાની ઝાંપલીમાં થઈને આવજે.'   જીવીની નિસ્તેજ આંખોમાં તેજ આવ્યું...એના શરીરમાં જાણે કે પુનઃ લોહીનું પરિભ્રમણ શરૂ થયું. તેણે સાટકો છોડી દીધો. અને સીધી જ દોડતી બાજુની પગદંડી તરફ વળી ગઈ.   વાળું પતાવીને જગતો વરંડામાં ગયો. બળદને નીરણ પૂરણ કરી ફરી ખિસ્સામાંથી બીડી કાઢી સળગાવી અને રોજની આદત મુજબ તે આજે ભઈબંધો પાસે બેસવા ગયો નહીં.       ઘરનું બારણું આગળથી બંધ કર્યું અને દીવો રાણો કરી વરંડામાં જ એક ખૂણે અખવાળી ખાટલીમાં આડો પડયો...બીડીના ધૂમાડાના ગોટા આકાશમાં ફેંકી ટમટમતા તારલિયાઓને જાણે કે તે દબાવી દેવા માંગતો હતો.   એક ફૂંક, બે ફૂંક, ત્રણ ફૂંક એમ ઉપરાઉપરી તડ તડ બીડી અડધી થઈ ગઈ અને અંધારા અવકાશના કોઈક ખૂણે એની નજર સ્થિર થઈ.   તેનું હૃદય આજે લગીર વધુ જોરથી ધબકી રહ્યું હતું...આજે જીવીની વાટ જોવાનો કેટલાં વર્ષે તેને પુનઃ લહાવો મળ્યો હતો!   નાનપણથી જ સાથે રમેલાં, લડેલાં અને ઉછરેલાં જીવી અને જગતો એક હતાં, એમની વચ્ચે કોઈક અતૂટ ગાંઠ હતી.   જગતાને યાદ આવ્યું કે તે દિવસો કદાચ ઉનાળાના હતા. ખરા બપોરે નદીના એક ધરામાં બળદને નવરાવવા આવ્યો હતો. આવા ઊંડા ધરામાં નાહવાની જગતા સિવાય બીજા કોઈની તાકાત નહોતી....લોકોમાં એવી વાતો હતી કે એમાં મોટી સાપણ રહે છે. તેથી કોઈ ત્યાં જવાનું પસંદ કરતાં નહીં. બળદની પીઠને ચોળી ચોળીને નવરાવતા ખુલ્લા બદને ઊભેલા જગતાની જુવાનીને કોઈ દૂર ઊભું ઊભું પી રહ્યું હતું....તે જીવી હતી. દૂર ઊભાં ઊભાં જ તેણે એક કાંકરો ફેંક્યો અને સીધો જ જગતાની પીઠ પર વાગ્યો. તેણે પાછા ફરી જોયું તો જીવી હસતી હતી.   'આંય આય ને...છેટે રહીને હેનાં લાડ કરે સે!': જગતાંએ જીવીને બોલાવી.   પછી તો બંને જણે મળીને બળદને નવરાવ્યા, ખૂબ નવરાવ્યા, ઊજળા બટક કરી દીધા.   જગતાએ કહ્યું: 'હવે મને નવરાવ.'   સામે પાણી ઉલાળતાં જીવીએ તીખી આંખ કરતાં કહ્યું: 'સા....આવું ઊઘાડું હું બોલે છે...શરમે ય નથી આવતી?'   'મારે કયાં કંઇ ખરાબ કરવાનું છ તે શરમ આવે! માર તો તારી હારે હૌના દેખતાં લગ્ન કરવાનું છે. પછી કોના ભાની ફકર!': જગતાએ રોકડો જવાબ આલ્યો.   ભીના હાથે જીવીના બે બાવડાં ઝાલી રાખી તેને પાણીમાં જ ઊંચી કરી જગતો બોલ્યોઃ'જીવી, આમ ને આંમ તો બૌ થીયું...હવે તો જોઈ રૈવું નથી ખમાતું...તને કાચીને કાચી ખાઈ જાઉં એમ થાય છે.'   જગતાએ દાંત કચકચાવી જીવીના બાહુને મસળી નાંખ્યા અને જીવીએ આંખો બંધ કરી એ દર્દને સહી લીધું.   જીવીની આંખો ઊંચી ઊઠી. એમાં જગતાને કશુંક અદ્ભુત ખેંચાણ માલૂમ પડયું...તેણે એક હાથ છૂટો કર્યો અને જીવીના ફાટેલા કબજાની અંદર થઈ એની પીઠ પર પ્રસર્યો. જીવીએ એનું મોં જગતાની છાતીમાં છૂપાવી દીધું. અને એના હાથ જગતાની આસપાસ ફરી વળ્યા.   જગતો પણ જાણે કે કોઈ નાગણની ચૂડમાં બંધાઈ ગયો...અને એકાએક એ ચૂડમાંથી મુક્ત થઈ ગયો. જીવીના હાથ ઢળી પડયા અને તેનું આખું શરીર શિથિલ થઈ ઢગલાની જેમ નીચું ઢળવા લાગ્યું. જગતાને ધ્રાસકો પડયો...તેણે પાણીમાં ગબડી રહેલી જીવીને ઊંચકીને બહાર કાઢી કિનારા પર સુવાડી.   જીવીનું મોં લીલુંછમ થઈ રહ્યું હતું. જગતો સમજી ગયો કે કોઈ જાનવર-કદાચ પેલી સાપણ જ એને ડંસી ગઈ છે. જગતાને એનો હાથ લોહીવાળો જણાયો. જોયું તો બરાબર જીવીની પીઠ પર ડંસ દેવાયો હતો.   જીવીએ આંખો ખોલી. તે માત્ર આટલું જ બોલીઃ 'જગતા...આવ મને વળગી પડ...જગ....'   એટલું બોલતાં જ એના મોંમાંથી લોહીનો કોગળો થઈ ગયો અને જીવીની આંખો મીંચાઈ ગઈ...   આગળ ધપી રહેલી રાત્રીની એને ખબર નહોતી.   હજુયે તેનું મન અને મગજ ભૂતકાળમાં જ ગૂંથાયેલાં હતાં. માથે હરણિયું આવી ગયું હતું...અને ચ્યુંઉ...કરતી વંડાની ઝાંપલી ખૂલી.   તારલિયાંના આછા ઉજાસમાં એક સ્ત્રી અંદર આવતી જણાઈ. તેણે જગતાને ઢંઢોળ્યો...જગતો જાગૃત થયો. તેણે હાથ ઊંચા કર્યા. જીવીએ તેના હાથ પકડી બેઠો કર્યો. બંને જણ ઘરની અંદર ગયાં....વર્ષો સુધીના આ ઘર તરફના જીવીના આંટાફેરા બાદ આજે પહેલી જ વાર ઘરમાં બારણાં ભીડાઈ ગયાં. કદાચ જીવીનો આ છેલ્લો આંટો હતો...જગતાને આજ પોતાના જાનની પરવા નહોતી. કોઈપણ ભોગે તે જીવીને પ્રેતયોનિમાંથી મુક્ત કરવા માંગતો હતો.   ઘરમાંથી આવતા ખડખડાટ હસવાના અવાજને સાંભળીને વાગોળી રહેલા બળદોએ ફરી ડોક ધુણાવી અને નીરવ શાંતિમાં ટોકરીનો રણકાર વહેતો કરી દીધો.

__._,_.___

---

Posted by: Bhupendra Jesrani <jesranibd@yahoo.co.in>

---

Reply via web post

•

Reply to sender

•

Reply to group

•

Start a New Topic

•

Messages in this topic (1)

World&#39;s Best forwarded emails...

Spread a word to join amdavadis4ever-subscribe@yahoogroups.com

To translate the posted material into your native/regional language,
please visit http://translate.google.com/

Like us on facebook: amdavadi amdavadi

Visit Your Group

• New Members 58

• Privacy • Unsubscribe • Terms of Use

.

__,_._,___