to translate this article to Language of your choice.

સત્તાપ્રાપ્તિ એ અમારો કોમન મિનિમમ પ્રોગ્રામ મહેબૂબા મુફ્તી



સિક્રેટ ડાયરી - નિખિલ મહેતા

જમ્મુ અને કાશ્મીરના પહેલા મહિલા મુખ્ય પ્રધાન બનવાની ખુશનસીબી મારા હાથમાં લખાયેલી છે. આમ તો હું એક પાક્કા રાજકારણીની બેટી છું એટલે મારા નસીબમાં દરેક પ્રકારની ખુશીઓ લખાયેલી જ છે, છતાં અત્યારે સમય એવો છે કે થોડી મહેનત કરવી પડે એમ છે. અબ્બાજાન મુફ્તી સાબ જીવિત હતા ત્યાં સુધી વાત અલગ હતી. આખા મુલ્કમાં એમની એક શાન હતી. લોકો એમને ઇજ્જત આપતા હતા. જે લોકો નહોતા આપતા એમની અમને કોઇ ફિકર નથી. પણ અમે અનેક વર્ષોથી જમ્મુ અને કાશ્મીરના રાજકારણમાં અડ્ડો જમાવીને બેઠા છીએ એટલે અહીં શાસન કરવાનો અમને અધિકાર છે એવું અમે માનીએ છીએ. મૂળ તો અમે કૉંગ્રેસી કલ્ચરના રાજકારણીઓ છે. અબ્બાજાને વર્ષો સુધી કૉંગ્રેસમાં રહીને લોકોની સેવા કરી. એ તો દેશના ગૃહપ્રધાનપદ સુધી પહોંચી ગયા હતા અને જમ્મુ અને કાશ્મીરમાં અમારા કટ્ટર દુશ્મન અબ્દુલ્લા ખાનદાનને પૂરી ટક્કર આપતા હતા. પછી અમને સમજાયું કે કૉંગ્રેસનો તો કોઇ ભરોસો થઇ શકે એમ નથી. એને લાગે કે જમ્મુ અને કાશ્મીરમાં નેશનલ કૉંગ્રેસ લોકપ્રિય છે તો કૉંગ્રેસ એની સાથે જોડાણ કરે અને નેશનલ કોન્ફરન્સની લોકપ્રિયતા ઘટી જાય તો બીજા વિકલ્પો શોધે. કૉંગ્રેસના આવા વલણથી અબ્બાજાન કંટાળી ગયા અને છેવટે તેનાથી છેડો ફાડી નાંખ્યો. એમણે જમ્મુ એન્ડ કાશ્મીર પીપલ્સ ડેમોક્રેટિક પાર્ટી (પીડીપી) નામના નવા પક્ષની સ્થાપના કરી હતી. પક્ષને નામ તો ગમે તે આપવું પડે, બાકી અમારે પીપલ કે ડેમોક્રેસી સાથે એવું કોઇ મમત્વ નહોતું. અમારા પક્ષના ઉદ્દેશ્ય અને હેતુ સાફ હતા: કોઇ પણ હિસાબે રાજ્યમાં સત્તા પ્રાપ્ત કરવી. પક્ષના એ સિદ્ધાંતોને આજે પણ અમે વળગી રહ્યા છીએ અને સત્તા પ્રાપ્ત કરવા માટે ગમે તેવું ઊલટું સૂલટું કરવા સજ્જ રહીએ છીએ. પિતાના અસલી વારસ તરીકે મારે પણ રાજકારણમાં ઝુકાવવાનું જ હતું. એ પહેલા મેં લોની ડિગ્રી લઇ લીધી, જેથી રાજકારણની ખટપટ વધુ સારી રીતે કરી શકાય. ૨૦૧૪ની લોકસભાની ચૂંટણીમાં અનંતનાગ મતવિસ્તારમાં મારો ભારે બહુમતી સાથે વિજય થયો. એ પહેલા હું કૉંગ્રેસની ટિકિટ પર ચૂંટણી જીતી શકી હતી. જમ્મુ અને કાશ્મીરમાં વર્ષોથી બે જ પક્ષોનું વર્ચસ હતું કૉંગ્રેસ. અમે કૉંગ્રેસથી અલગ થયા એટલે અમારો પણ એક અલગ ચોકો બન્યો. અને હવે બીજેપીએ પણ આ રાજ્યમાં પગપેસારો કર્યો છે. આના કારણે મામલો જરા ગૂંચવણભર્યો બની ગયો છે. જોકે ગમે એવી ગૂંચવણભરી સ્થિતિમાંથી બહાર નીકળીને સત્તાપ્રાપ્તિનો માર્ગ શોધી કાઢવો એ એક સાચા રાજકારણીનું કર્તવ્ય છે. મારા અબ્બાજાન મરહૂમ મુફ્તીસાહેબે બીજેપી સાથે જોડાણ કરીને રાજ્યમાં સરકાર રચી અને તેઓ મુખ્ય પ્રધાન બન્યા. અમારી સરકાર બની ત્યારે ઘણા લોકોએ એની એવી ટીકા કરી હતી કે આ બન્ને પક્ષોના વિચારો એકબીજાથી વિરુદ્ધના છે. આવી ટીકામાં એક મોટો વિરોધાભાસ હતો. કહેવા ખાતર તો અમારા બન્ને પક્ષોના વિચારો અલગ હતા, પરંતુ મૂળભૂર સિદ્ધાંતોની દૃષ્ટિએ બીજેપી અને અમારા પીડીપી બન્નેમાં મોટું સામ્ય હતું. અમે બન્ને કોઇ પણ ભોગે સત્તા હાંસલ કરવામાં માનીએ છીએ. હવે અમારા જેવા બે પક્ષોનું જોડાણ થાય એટલે લોકો કોઇક તો અપેક્ષા રાખવાના જ. આથી અમે કોમન મિનિમમ પ્રોગ્રામ નક્કી કર્યો અને એને અનુસરવાનું નક્કી કર્યું, પરંતુ મુફ્તીસાહેબ તો રાજકારણના મોટા ખેલાડી હતા. જમ્મુ અને કાશ્મીરના રાજકારણમાં લાંબા સમય માટે ટકી રહેવું હોય તો શું કરાય એની એમને પાકી ખબર હતી. હકીકતમાં જમ્મુ અને કાશ્મીરની વાસ્તવિકતાનો પાઠ અમે બહુ કડવી રીતે શીખ્યા છીએ. અહીં કાશ્મીરની આઝાદી માટેની ચળવળ વર્ષોથી ચાલે છે અને એના સમર્થનમાં કાશ્મીરીઓના એક વર્ગે ત્રાસવાદનો આશરો લીધો છે. ૧૯૮૯માં આવા જ એક ત્રાસવાદી જૂથે મારી બહેન રૂબિયાનું અપહરણ કર્યું અને એની મુક્તિના બદલામાં કેટલાક ખતરનાક ત્રાસવાદીઓને સરકારે છોડવા પડ્યા. આ પારિવારિક ટ્રેજડી પછી મુફ્તીસાહેબે નક્કી કર્યું કે કાશ્મીરની આઝાદી માગતા યુવાનોનો વિરોધ ક્યારેય ન કરવો. એમના પ્રત્યે સહાનુભૂતિ રાખવી અને એમનો પક્ષ લઇને લશ્કર તથા કેન્દ્ર સરકારની ટીકા કરતા રહેવું. કાશ્મીરમાં લોકપ્રિયતા મેળવવા માટેની આ પ્રાથમિક જરૂરિયાત છે. આથી મુફ્તીસાહેબ સરકાર રચ્યા પછી કાશ્મીરીઓને પસંદ આવે એવાં પગલાં લેતા રહ્યા. મસરત આલમ જેવા ત્રાસવાદીને છોડ્યો. ચૂંટણીઓ શાંતિપૂર્ણ રીતે યોજવા દેવા બદલ પાકિસ્તાનનો આભાર માન્યો. બીજી તરફ બીજેપીને લુખ્ખા ખુલાસા દેતા રહ્યા. રાજ્યનું શાસન બરોબર ચાલી રહ્યું હતું એવામાં અબ્બાજાન અલ્હાને પ્યારા થઇ ગયા. હવે કાશ્મીરમાં પીડીપીને ફરીથી સત્તા પર બેસાડવાની જવાબદારી મારા પર આવી છે. અલબત્ત, પીડીપી સત્તા પર આવે એટલે મુખ્ય પ્રધાન મારે જ બનવાનું છે, પરંતુ એ માટે બીજેપીને મૂર્ખ બનાવવાની કેટલીક કવાયત કરી લેવી જરૂરી છે. બીજેપી એમ વિચારે છે કે કેન્દ્રમાં એમની સત્તા છે એટલે શક્ય એટલા વધુ રાજ્યોમાં પણ એમની સરકાર બને. પોતાની સરકાર બનાવવા માટે અન્ય રાજ્યોમાં તો બીજેપી તોડફોડ કરે છે, જ્યારે જમ્મુ અને કાશ્મીરમાં તો એણે અમારા જેવા તોડફોડિયા પક્ષને ફક્ત સપોર્ટ કરવાનો છે. અબ્બાજાનના શાસન દરમિયાન બીજેપીને થોડી તકલીફ પડી હતી એ હું માનું છું, કારણ કે અમે કોમન મિનિમમ પ્રોગ્રામનો અમલ કરવાને બદલે અમારો પોતાનો જ એજન્ડા આગળ ચલાવ્યો હતો અને એના કારણે દેશભરમાં બીજેપીની ટીકા થઇ હતી. અમારા કારનામા માટે બીજેપીને જવાબો કે ખુલાસા આપવાનું ભારે પડી જતું હતું. આથી જ અબ્બાજાનના મોત પછી બીજેપીએ અમારી સાથે વાટાઘાટ કરવાની ઉતાવળ ન કરી. અમે પણ કોઇ ઉતાવળ ન બતાવી. ગરજ બન્ને પક્ષે છે, છતાં અમે જાણીએ છીએ કે અમારી સાથે જોડાણ કરવામાં બીજેપીને વધુ રસ છે. બીજી તરફ બંધારણીય કોકડું પણ ગૂંચવાય એમ છે. આમાં પાછું કૉંગ્રેસ અને નેશનલ કૉંગ્રેસ જેવા અમારા કટ્ટર હરીફો સક્રીય બને અને કંઇક ઊલટું સૂલટું કરે એના પહેલા અમારે સફાળા જાગી જવાની જરૂર હતી. આથી તો હું જનાબ નરેન્દ્ર મોદીને મળવા માટે છેક દિલ્હી ગઇ. એમાં કંઇ આપણે નાના નથી થઇ જતા. જમ્મુ અને કાશ્મીરમાં નવેસરથી સરકાર રચવા માટે અમે બીજેપી સાથે વાટાઘાટ કરીને ઘણી બધી વાતો પર ફેંસલા કરીશું. અમે અમારા તરફી બીજેપીને અને મૌખિક વચનો આપીશું, છતાં અમારા પોતાના અગ્રતાક્રમ નક્કી છે. અમે અમારા અગ્રતાક્રમોને જ વળગી રહીશું. જેમ કે બીજેપીને કાશ્મીરી પંડિતો બાબતે કંઇક કરવાની ઉતાવળ છે, જ્યારે અમને કાશ્મીરી પંડિતોમાં કોઇ રસ જ નથી. આ જ રીતે કાશ્મીરમાં લડત ચલાવી રહેલા યુવાનો બાબતે મક્કમ હાથે કામ લેવાનો અમારો કોઇ ઇરાદો નથી. કાશ્મીરમાં ક્યારેક અમુક લોકો હિન્દુસ્તાનનો ધ્વજ બાળે છે અને ક્યારકે દેશવિરોધી સૂત્રો ઊચ્ચારે છે, પરંતુ અમારી નીતિ આવી બાબતોની અવગણના કરવાની છે. જરૂર પડશે તો અમિત શાહની હાજરીમાં હું ભારત માતા કી જય બોલી દઇશ, પણ અમારી મૂળભૂત નીતિઓમાં હું કોઇ ફેરફાર નહીં કરું. બીજેપી પાસે અમારા સિવાય કોઇ વિકલ્પ જ નથી. સત્તાથી દૂર રહેવાનું એમને પસંદ નથી એટલે આખરે તો બીજેપી અમને જ આગળ કરશે. હું મુખ્ય પ્રધાન બનીશ અને મારા અબ્બાજાનના પગલે આગળ ચાલીશ. કાશ્મીરીઓ ખુશ રહેશે અને બીજેપી તથા એમના ટેકેદારો કકળાટ કરતા રહેશે. કાશ્મીરમાં આઝાદીની લડત ચાલુ રહે તો એની સામે પણ અમને વાંધો નથી. અમને ફક્ત એક જ વાતમાં રસ છે: સત્તા હાંસલ કરવી. અને નરેન્દ્ર મોદીને મળ્યા પછી મારો ઉત્સાહ વધી ગયો છે. તેઓ પણ ઇચ્છે છે કે કાશ્મીરમાં બીજેપી પીડીપી જોડાણની સરકાર બને. બસ, હવે થોડો સમય રાહ જોવાની છે.

(નિખિલ મહેતાએ કરેલી કલ્પના)

__._,_.___

Posted by: Kishor Mehta <devdrashti@hotmail.com>

Reply via web post

•

Reply to sender

•

Reply to group

•

Start a New Topic

•

Messages in this topic (1)

World's Best forwarded emails...

Spread a word to join amdavadis4ever-subscribe@yahoogroups.com

To translate the posted material into your native/regional language,
please visit http://translate.google.com/

Like us on facebook: amdavadi amdavadi

Visit Your Group