to translate this article to Language of your choice.

હું અનેક સ્પોર્ટ્સમાં પારંગત છું: સલમાન ખાન



સિક્રેટ ડાયરી - નિખિલ મહેતા

હું નખશિખ સ્પોર્ટ્સમેન છું. સ્વિમિંગ, બોક્સિગં, હન્ટિંગ, બન્ને પ્રકારના શૂટિંગ (ફિલ્મનું અને બંદૂકનું), ફ્લોટિંગ, ફ્લર્ટિંગ જેવી અનેક સ્પોર્ટ્સમાં હું ચેમ્પિયન છું. આ જાણકારી મેળવ્યા પછી જો મારો ટીકાકાર હૃદય પર હાથ મૂકીને વિચારશે તો એને અંદરથી એવો જ જવાબ મળશે કે ઓલિમ્પિક્સ એમ્બેસેડર બનવા માટે સલમાન ખાન જ સૌથી વધુ લાયકાત ધરાવે છે

દેશ માટે કંઇક કરી છૂટવાની ભાવના મારા મનમાં જન્મથી છે. મોટો થયા પછી એ ભાવના પ્રબળ બની એટલે હું ફિલ્મોમાં આવ્યો, સ્ટાર બન્યો. સ્ટાર બન્યા પછી મારામાં માનવતાવાદ ખીલ્યો. પછી તો દેશપ્રેમ અને માનવતાવાદ મારા સમગ્ર અસ્તિત્વ સાથે ગૂંથાઇ ગયા. હવે સ્થિતિ એવી છે કે મારા લોહીમાં આલ્કોહોલ, દેશપ્રેમ અને માનવતાવાદ સિવાય બીજું ભાગ્યે જ કંઇ બચ્યું છે. દેશપ્રેમ અને માનવતાવાદના એક એકથી ચડિયાતા પુરાવા આપ્યા પછી હવે હું એક નવું નજરાણું લાવ્યો છું. હવે હું ઓલિમ્પિક્સમાં ભારતનો બ્રાન્ડ એમ્બેસેડર બન્યો છું. ઓલિમ્પિક્સ એમ્બેસેડર બનીને હું કેટલો મોટો ભોગ આપી રહ્યો છું એનો કોઇને અંદાજ નથી. તોય કેટલાક અવળચંડા લોકો આ બાબતે મારી ટીકા કરે છે. કહે છે કે મોદીજી સાથેના સંબંધને કારણે મને આ તક મળી. અરે ભાઇ, આમાં તક જેવું શું છે? આ તો સેવાનું કામ છે. અમિતાભજી જો ગુજરાતના એમ્બેસેડર બનીને દેશની સેવા કરી શકે તો હું ઓલિમ્પિક્સ એમ્બેસેડર કેમ ન બની શકું? મોદીજી સાથે ઓળખાણ છે તો શું થઇ ગયું? મોદીજી સાથે તો શત્રુઘ્ન સિંહાને પણ ઓળખાણ છે. એમને કેમ ન બનાવાયા ઓલિમ્પિક્સ એમ્બેસેડર? વાત એ છે કે ઓલિમ્પિક્સ એમ્બેસેડર બનવા માટે ઘણો ભોગ આપવો પડે. જોકે મારો બધો જ ફાઇનાન્શિયલ વહીવટ ડેડી સંભાળે છે અને એમણે મને આ બાબતે કંઇ જ જાહેર કરવાની ના પાડી છે. મારા એક દોસ્તે મને કહ્યું કે પહેલા ઓલિમ્પિક્સ એમ્બેસેડર અને ડેડીની રાજ્યસભાની બેઠક બાબતે જોઇન્ટ ડીલ થવાની હતી, પણ પછી બજેટ વધી ગયું એટલે ડેડીએ પોતાનું રાજ્યસભાનું કેન્સલ કર્યું. સાચી વાત શી છે, કોને ખબર. ડેડી મને એ વિશે કંઇ કહેવાના નથી અને હું એમને કંઇ પૂછવાનો નથી. ડેડી છેલ્લા કેટલાક સમયથી મારી સાથે બહુ જ સ્ટ્રીક્ટ થઇ ગયા છે અને મને જાહેરમાં કંઇ જ બોલવાની ના પાડે છે. પણ એમ કંઇ સાવ બોલ્યા વિના થોડું ચાલે? હા, એમના કહેવાથી રાત્રે નશો કરીને ટ્વિટ કરવાનું મેં બંધ કર્યું છે, પણ બાકી બધું ચાલુ છે. અને હવે ઓલિમ્પિક્સ એમ્બેસેડર તરીકે તો મારે અનેકવાર બોલવું પડશે અને એ રીતે છબરડા વાળવાની મને અનેક તકો મળશે. જોકે ડેડીની બધી વાતોમાં કંઇ દમ નથી હોતો. એ પણ ક્યારેક છબરડા વાળે છે. મિલ્ખા સિંહ બાબતે એમણે એવો લોચો માર્યો કે બોલીવૂડે મિલ્ખા સિંહ પર મહેરબાની કરીને એમને ફેમસ બનાવ્યા. એમણે આવું ન બોલવું જોઇએ. પણ હવે મોટી ઉંમરના માણસને આપણે શી સલાહ આપી શકીએ. ડેડીની વાતનું મને ખાસ ટેન્શન નથી. ટેન્શન આ ટીકાકારોનું છે. એ લોકો મારી પાછળ પડી ગયા છે. કેટલાક એવી ટીકા કરે છે કે હું સ્પોર્ટ્સમેન નથી એટલે હું ઓલિમ્પિક્સ એમ્બેસેડર બનવાને લાયક નથી. એમ તો અમિતજી ગુજરાતી નથી છતાં એમને ગુજરાતના એમ્બેસેડર બનાવવામાં આવ્યા હતા. ગોવિંદાને ઘૂંટણનો દુ:ખાવો નથી છતાં એને ઘૂંટણે ઘસવાના તેલનો એમ્બેસેડર બનાવવામાં આવ્યો છે. નવજોતસિંહ સિદ્ધુ પાજીને અંગ્રેજી સાથે દુશ્મની છે છતાં એમને કોઇક અંગ્રેજી શીખવતા મશીનના એમ્બેસેડર બનાવવામાં આવ્યા છે. આવા તો અનેક દાખલા મોજૂદ છે, છતાં એમની કોઇ ટીકા નથી કરતું. મારી જોકે મૂળભૂત દલીલ એ છે કે હું સ્પોર્ટ્સમેન નથી એ વાત જ ખોટી છે. હું નખશિખ સ્પોર્ટ્સમેન છું. એક નહીં, હું તો અનેક સ્પોર્ટ્સમાં પારંગત બન્યો છું. સૌથી પહેલા તો હું એક અચ્છો વેઇટ લિફ્ટર છું, અચ્છો કુસ્તીબાજ છું. હકીકતમાં મારું બોડી એ જ મારું યુએસપી છે, બાકી મારી એક્ટિંગ પર મેં ક્યારેય ભરોસો નથી રાખ્યો. ફિલ્મમાં હું એક વાર શર્ટ ઉતારું એમાં જ નિર્માતાના પૈસા વસૂલ થઇ જાય છે. શર્ટ ઉતારીને હું મારા બાવડા ફુલાવું ત્યારે મારા ચાહકો ખુશ થઇ જાય છે. અને મારું બોડી કંઇ એમ જ નથી બન્યું. એ માટે હું સખત મહેનત કરું છું, વર્કઆઉટ કરું છું, વેઇટ લિફ્ટિંગ કરું છું. ડેડી સાચું જ કહે છે કે સ્પોર્ટ્સમેન તરીકે એક વેઇટ લિફ્ટર છું. હવે આ બાબતમાં પણ લોકો એવી ટીકા કરે છે કે હું કંઇ યોગેશ્ર્વર દત્ત કરતાં વધુ સારો વેઇટ લિફ્ટર નથી. હકીકત એ છે કે હું ભારતના કોઇ પણ વેઇટ લિફ્ટર કરતાં વધુ સારો વેઇટ લિફ્ટર છું. શ્રેષ્ઠ વેઇટ લિફ્ટર એ નથી જે વધુ વજન ઊંચકે, શ્રેષ્ઠ વેઇટ લિફ્ટર એ છે, જેનું વધુ વજન પડે. જો યોગેશ્ર્વર દત્તનું મારા કરતાં વધુ વજન પડતું હોત તો ઓલિમ્પિક્સ એમ્બેસેડર તરીકે એની પસંદગી ન થઇ હોત? બીજી મહત્ત્વની વાત એ છે કે મારી આગામી ફિલ્મ 'સુલતાન' માં હું એક કુસ્તીબાજની ભૂમિકા કરી રહ્યો છું. મારી ફિલ્મ રિલીઝ થશે અને કરોડો રૂપિયા કમાશે એ પછી દેશના ખૂણેખૂણામાં લોકો મને દેશના શ્રેષ્ઠ કુસ્તીબાજ તરીકે ઓળખતા થઇ જશે. મારી સામે બીજા સ્પોર્ટ્સમેન ઝાંખા પડી જશે. કુસ્તી ઉપરાંત હું એક સારો વાહનચાલક છું. એક પિતા પોતાના પુત્રના વખાણ કરે તો સારું ન લાગે એટલે ડેડીએ મારા વિશે ફક્ત એટલું કહ્યું કે સલમાન એક સારો સાઇક્લિસ્ટ છે, પણ હું સાઇકલ ઉપરાંત બીજાં વાહનો પણ સારી રીતે ચલાવી શકું છું. હું બાઇક ચલાવી શકું છે અને કાર પણ ચલાવી શકું છું. કાર તો એવી સરસ રીતે ચલાવી શકું છું કે જોનારની આંખ ફાટી જાય અને એના મોઢામાંથી રાડ નીકળી જાય. ચાર લેનના માર્ગ પર હું કાર ચલાવતો હોઉં ત્યારે મને છ લેન દેખાય એવી મારી બાજનજર છે. એક બાહોશ વાહનચાલક તરીકે હું માર્ગ અને ફૂટપાથ વચ્ચે કોઇ ભેદભાવ નથી રાખતો. કાર ચલાવતી વખતે ચાર લેન અને બે ફૂટપાથ એ દરેક પર મારો પૂરો અંકુશ અને કબજો રહેતો હોય છે. મારે મારી કાર જ્યાં ચલાવવી હોય ત્યાં હું ચલાવું છું. મેરી મરજી. આ ઉપરાંત સ્વિમિંગ, બોક્સિગં, હન્ટિંગ, બન્ને પ્રકારના શૂટિંગ (ફિલ્મનું અને બંદૂકનું), ફ્લોટિંગ, ફ્લર્ટિંગ જેવી અનેક સ્પોર્ટ્સમાં હું ચેમ્પિયન છું. આ જાણકારી મેળવ્યા પછી જો મારો ટીકાકાર હૃદય પર હાથ મૂકીને વિચારશે તો એને અંદરથી એવો જ જવાબ મળશે કે ઓલિમ્પિક્સ એમ્બેસેડર બનવા માટે સલમાન ખાન જ સૌથી વધુ લાયકાત ધરાવે છે. મને જોકે ક્યારેક મારો પોતાનો જ ડર લાગે છે. પચાસ વર્ષની ઉંમરે મેં જે રીતે મારું બોડી બનાવ્યું છે એની પાછળનું રહસ્ય છતું ન થઇ જાય તો સારું. દુનિયા નથી જાણતી, પણ મારા નજીકના મિત્રો અને હિતેચ્છુઓ જાણે છે કે મારું આ અલમસ્ત બોડી સ્ટેરોઇડ્સને કારણે ફૂગી ગયેલું છે. સ્પોર્ટ્સ જગમાં સ્ટેરોઇડ્સ કોઇ નવી વાત નથી. ઓલિમ્પિક્સમાં પણ અનેક રમતવીરોના ચંદ્રકો ડ્રગ્સ પોઝિટિવને કારણે પાછા લઇ લેવામાં આવતા હોય છે અને એમને ડિસ્કવોલિફાય કરવામાં આવતા હોય છે. મને ડર એ છે કે જો ઓલિમ્પિક્સમાં મારો ટેસ્ટ લેવામાં આવશે અને મારા શરીરની અંદરનું સ્ટેરોઇડ્સ પકડાઇ જશે તો મને ઇન્ડિયાના ઓલિમ્પિક્સ એમ્બેસેડર તરીકે ડિસ્ક્વોલિફાય કરવામાં આવશે. ફરી પાછું ટેન્શન ઊભું થશે. ડેડી જોકે બધે પહોંચી વળે એવા છે. (નિખિલ મહેતાએ કરેલી કલ્પના)

__._,_.___

Posted by: Kishor Mehta <devdrashti@hotmail.com>

Reply via web post

•

Reply to sender

•

Reply to group

•

Start a New Topic

•

Messages in this topic (1)

World's Best forwarded emails...

Spread a word to join amdavadis4ever-subscribe@yahoogroups.com

To translate the posted material into your native/regional language,
please visit http://translate.google.com/

Like us on facebook: amdavadi amdavadi

Visit Your Group