[amdavadis4ever] જનેતાનું ધાવણ: જુ વાન જનેતા નું ધાવણ ઉજાળી જંગ માં ખપી ગ યો Raghavji Madhad

 

Please use http://translate.google.com/ to translate this article to Language of your choice. જનેતાનું ધાવણ: જુવાન જનેતાનું ધાવણ ઉજાળી જંગમાં ખપી ગયો Raghavji Madhad બાબરિયાવાડના ભચાદર ગામને ચારેબાજુથી ભરડો લઇ સરકારી, દરબારી અને સુલતાની એમ ત્રણ થરી ગિસત ઘેરો ઘાલીને ઊભી છે. એકેય બાજુની છટકબારી રહેવા દીધી નથી. બરાબરનો લાગ લીધો છે, તેમાં મોતના માંડવે મર્દાનગીનો ખેલ ખેલાવાનો છે. દરબારી ગઢના કોઠે બહારવટિયો દેહવાળો ને તેની સાથી ટોળકી સંતાણી છે. કોઇ ગોતી ન શકે એવી આડશ લીધી છે. આ અડાબીડમાં રાત પણ ઓછી ઊતરવા માગતી ન હોય તેમ અંધકારનો ઘેરો ઘાલીને ઊભી છે. વિધવાના ઓઢણા જેવા કાળા અંધારામાં હાથ પડ્યો હાથ સૂઝે એમ નથી. માત્ર બંધુકોની ધણધણાટી ને તેમાંથી ઝરતાં તણખા સિવાય સઘળું કાળુંધબ છે. અમરેલી તાબેના વરસડા ગામના દરબાર દેહવાળાની બહારવટિયા ટોળકી ચારેબાજુથી ઘેરાઈ ગઈ છે. બચવાનો કોઈ આરો-ઓવારો રહ્યો નથી. મરણિયો જંગ ખેલાઇ  રહ્યો છે. ભડાકા કરવા માટે દેશી બંધૂકને વારંવાર ભરવાથી બંધૂકનાં નાળચાં એવા તો ધગી ગયાં છે કે તેમાં દારૂ ધરબવા જાય ત્યાં જ ગરમીના લીધે ભડકો થઇ જાય છે. દારૂ ભરનાર કોળી જુવાન મરદનું ફાડિયું ને માથે બે બાચકા. તેના હાથ દાઝવા લાગ્યા છતાં ઊંહકારો કર્યા સિવાય બંધૂકો ભર્યે જાય છે. આમ ને આમ બેય હાથ કોણી લાગી દાઝી ગયા છે. ક્યાંક તો હાથમાંથી માંસના લોચા નીકળવા લાગ્યા છતાંય છેલ્લી ઘડી લગી તે અટક્યો નહિ અને ધીંગાણા માટે આમ કામ કરતો રહ્યો. ત્રણ જાતની ગિસત, સામટા માણસોને ગિસત પાસે પૂરતો દારૂગોળો હતો એટલે દેહાવાળાની કારી ફાવી નહિ. મરણિયો જંગ ખેલવા છતાંય તેઓ ધીંગાણામાં કામ આવી ગયા. કાળીઝાણ રાત પસાર થઇ, પ્રાગઢ્યનો પ્હો ફાટ્યો, સહેજ અજવાળું થતાં જ ફોજના માણસો દેહાવાળાના દેહને લેવા માટે આવ્યા. સિપાઈઓએ જોયું તો દેહાવાળાના દેહની લગોલગ એક લવરમૂછિયો જણ મોતની મીઠી નીંદરમાં પોઢી ગયો હતો. તેના બન્ને હાથ કોણી સુધી સળગી ગયા હતા. જોનારા સૌ દંગ થઇ ગયા. તેની ભાળ મેળવી તો ખબર પડી કે, કોઈ કોળી પરિવારનો જણ હતો ! જાફરાબાદ પાસેના લુણસાપુર ગામમાં જાદવ સાખે ઉનડ નામે એક કોળી પટેલ રહે. તેનો રોટલો ને રખાવટ જબરી. બાબરિયાવાડનું નાક કહેવાય. ભલભલા મનેખ ઉનડને ત્યાં મહેમાનગતિનો લહાવો લઇ આવ્યા છે. કોઇ માણસ તેના આંગણેથી ભૂખ્યું ન જાય. આમ તેનો રોટલો પ્રાચીથી લઈ છેક પીપાવાવ સુધી વખણાતો હતો. એક વખત કાગવદર ગામના દરબાર રામ વરુ લુણસાપુર નીકળેલા. થયું કે, આમ નીકળ્યો છું તે ઉનડને ત્યાં રોટલો ખાતો જાઉં, કસુંબા પાણી કરતો ને કરાવતો જાઉં! પણ ઉનડ જાદવ ઘેર નહોતા તે રામ વરુ તેમની વાડીએ ગયા. રામ વરુને પોતાની વાડીએ આવેલા જોઈ ઉનડ જાદવ રાજીના રેડ થઇ ગયા હતા. હૈયાના હરખથી મન ભરીને આવકાર્યા હતા. પછી તો, કસુંબાની ખરલો ઘૂંટવા લાગી,  ઠુંગા-પાણીની ઠોર જામી ને પોરહીલી વાતડિયુંના હિલ્લોળા વછૂટવા લાગ્યા હતા. રામ વરુને ઉનડ જાદવ વચ્ચે હેતપ્રીત બહુ, એકબીજાને ઠઠ્ઠા-મશ્કરી કરવાનો વહેવાર તેથી કસુંબો ને વાતોના રંગમાં ઠઠ્ઠા-મશ્કરી ક્યારે કરવા લાગ્યા તેનો કોઈને ખ્યાલ રહ્યો નહિ. બરાબર આ ટાણેજ ઉનડના ઘેરથી બાઇ-માણસ લાજ કાઢીને ડાયરાથી થોડાક દૂર પસાર થયાં. તે ભર્યે પેટ હતાં. રામ વરુની નજરથી આ અજાણ્યું રહ્યું નહિ. તેમણે સહેજ મોં મચકોડીને કહ્યું: 'હેં ઉનડ, તુને ભણ્યું કેટલાં વરહ થયાં!?' ઉનડ જાદવે એમ જ કહ્યું: 'થયાં હસ્યે, પચાહ પંચાવન!' 'તે હવે તો હાંઉ કર્ય ને પ્રભુનું નામ લ્યે!' રામ વરુનું કહેવું આખો ડાયરો સમજી ગયો ને પછી મર્માળું હસવા લાગ્યો. ડાયરાને આમ વહર્યું હસતો જોઈ ઉનડ જાદવને હાડોહાડ લગી આવ્યું. તેના અંગેઅંગમાં જાણે આગ લગી ગઈ. તે ભીતરથી ભડભડ બળવા લાગ્યો.'આહાહા..હું આઘેડવયનો છતાંય મારે ન્યાં ઘરવાળીને સારા દી' હોય.. રામરામ.' કહેતાં તેમણે મનોમન ગાંઠ વાળી લીધી.      પતિ-પત્નીનું આમ મળવું આજથી અગરાજ. પણ ઉનડના ઘરવાળા વેણ સાંભળી ગયા હતા. તેમને જીવવું ઝેર થઇ પડ્યું હતું. એક પળમાં જિંદગીનો છેડો ફાડી નાખવાનો નિર્ણય લઇ લીધો હતો. ઘેર આવી પાણીનો કોગળો પણ કર્યા વગર સીધું જ તાંસળીમાં અફીણ ઘોળ્યું હતું ને મોત મીઠું કરી ઘરચોળાની લાંબી સોડ તાણી લીધી હતી. બહારવટિયા દેહવાળાની ગિસતમાં બંધૂક ભરી દેનાર કોળી જુવાન, આ વેણ સહન ન કરનાર જાજરમાન માતાની કૂખે પાક્યો હતો. તેમનું ધાવણ ધાવી મોટો થયો હતો. આ જુવાન જનેતાનું ધાવણ ઉજાળી આમ જંગમાં ખપી ગયો હતો.

__._,_.___

---

Posted by: Bhupendra Jesrani <jesranibd@yahoo.co.in>

---

Reply via web post

•

Reply to sender

•

Reply to group

•

Start a New Topic

•

Messages in this topic (1)

World's Best forwarded emails...

Spread a word to join amdavadis4ever-subscribe@yahoogroups.com

To translate the posted material into your native/regional language,
please visit http://translate.google.com/

Visit Your Group

• New Members 79

• Privacy • Unsubscribe • Terms of Use

.

__,_._,___