[amdavadis4ever] અબુધ માણસ મા ટે વરદાન પણ શાપ સાબિત થય ું Ashu Patel

 

Please use http://translate.google.com/ to translate this article to Language of your choice. અબુધ માણસ માટે વરદાન પણ શાપ સાબિત થયું  Ashu Patel અબુધ માણસે થોડા કલાકોમાં જ પોતાને મળેલું વરદાન પાછુ ખેંચી લેવા ઉપરવાળાને આજીજી કરી   પરવાળાએ અબુધ ભારતીય નાગરિકને અદૃશ્ય થવાનું અને તે ઇચ્છે ત્યાં એ જ ક્ષણે પહોંચી શકવાનું વરદાન આપ્યું એટલે તે જુદી જુદી જગ્યાએ ફરવા માંડ્યો. તેને ઇચ્છા થઈ કે તે એક્ટિવિસ્ટ્સની વચ્ચે જઈને તેમની વાતો સાંભળે. બીજી સેકન્ડે તે એક મિટિંગમાં અદૃશ્યરૂપે હાજર થઈ ગયો. '...આપણે અવાજના પ્રદૂષણ વિષે વાત કરતા હતા.' એક ચશ્માંધારી માણસ કહી રહ્યો હતો: 'ગણપતિ અને નવરાત્રિના તહેવારો દરમિયાન અવાજનું પ્રદૂષણ માઝા મૂકી દે છે. એની વિરુદ્ધ આપણે કોર્ટમાં જવું જોઈએ.' બધાએ તેની વાતને સમર્થન આપ્યું, પણ એક પત્રકાર જેવા લાગતા માણસે કહ્યું, 'બિલકુલ બરાબર છે તમારી વાત. કોર્ટમાં જવું જ જોઈએ અને હા, સાથે દરરોજ મસ્જિદો પરથી લાઉડ સ્પીકર દ્વારા અવાજનું પ્રદૂષણ ફેલાય છે એને પણ તમારી જાહેર હિતની અરજીમાં...' 'હરામખોર, તું કટ્ટરવાદી છે. તારા જેવા માણસોને કારણે જ આ દેશનું તાલિબાનીકરણ થઈ રહ્યું છે.' પેલા બધા એકસાથે તેના પર તૂટી પડ્યા. પછી તેમની વચ્ચે જે ભાષાનો ઉપયોગ થવા માંડ્યો એ સાંભળીને અબુધ માણસ ત્યાંથી નાઠો.   અબુધ માણસે વિચાર્યું કે આ બધા તો હિંસક પ્રવૃત્તિના માણસો લાગે છે. લાવ કોઈ અહિંસાપ્રેમી વચ્ચે જાઉં. તે પંદર-વીસ અહિંસાપ્રેમીઓની સભામાં જઈ પહોંચ્યો. એક અહિંસાપ્રેમી કહી રહ્યો હતો: 'લોકો પતંગ ઉડાવે છે એના કારણે કેટલાંય કબૂતરોનાં ગળાં કપાઈ જાય છે. આપણે ધારદાર દોરા વડે પતંગ ઉડાડવાનો મોહ ત્યજવો જોઈએ.' એમાં એક માણસ બોલી પડ્યો: 'આપણા દેશમાં દરરોજ કેટલાય મિલિયન મરઘાંનાં ગળાં ઇરાદાપૂર્વક કપાય છે એની સામે પણ આપણે કંઈક કરવું જોઈએ!' એ સાથે એ સભામાં પણ હંગામો થઈ ગયો. અબુધ માણસ મુંબઈની પ્રેસ ક્લબમાં પહોંચી ગયો. ત્યાં ગુજરાતથી આવેલા કેટલાક પત્રકાર મિત્રો સાથે મુંબઈના એક પત્રકારની શરાબની મહેફિલ ચાલી રહી હતી. 'સાલું એક વાતે તમારી ઈર્ષા થાય કે અહીં 'અસલી' માલ ગેરંટી સાથે અને એ પણ સસ્તામાં મળે!' ગુજરાતથી આવેલા એક પત્રકારે કહ્યું. થોડી આડીતેડી વાતો પછી એ બધા વચ્ચે રાજકીય ચર્ચા શરૂ થઈ. યજમાન મુમ્બૈયા પત્રકાર ચર્ચા દરમિયાન સોનિયાબહેન ગાંધી, મમતાબહેન બેનર્જી, જયલલિતાબહેન, મહબૂબાબહેન મુફતી, વસુંધરાબહેન રાજે એ રીતે રાજકીય માનુનીઓનો ઉલ્લેખ કરી રહ્યો હતો.ગુજરાતથી આવેલા એક પત્રકારથી રહેવાયું નહીં. તેણે લથડતી જબાનમાં હસવાની નિરર્થક કોશિશ કરતાં કહ્યું: 'તને ચડી ગઈ છે. તું જયલલિતાબહેન, સોનિયાબહેન, મમતાબહેન એમ બોલી રહ્યો છે!' મુમ્બૈયા પત્રકારે કહ્યું: 'બિલકુલ નથી ચડી, આ તો તમારી સાથે વાતો કરતાં કરતાં મને સમજાયું કે મારામાં તહેઝીબ નથી એટલે મારી ભૂલ સુધારી રહ્યો છું!' 'સાલા તું પહેલેથી જ ગુજરાત વિરોધી છે!' ગુજરાતના એક પત્રકારે કહ્યું. યજમાન પત્રકારે વળતો જવાબ આપ્યો એટલે ધમાલ મચી ગઈ.   અબુધ માણસ એક વિદ્વાનના ઘરમાં જઈ ચઢ્યો. ત્યાં કેટલાક વિદ્વાનો વચ્ચે રાજકીય ચર્ચા ચાલી રહી હતી. એમાં એક વિદ્વાન ઊછળી ઊછળીને કહી રહ્યા હતા: 'લઘુમતીઓની અસલામતી દૂર કરવાની આ સરકારને બિલકુલ ચિંતા નથી. આ સરકાર લઘુમતી વિરોધી છે.' યજમાન વિદ્વાને કહ્યું: 'મારે એક સવાલ કરવો છે. કાશ્મીરના લાખો નિરાશ્રિત પંડિતો અને પાકિસ્તાનમાં સતત અત્યાચાર સહન કરતા લઘુમતી હિન્દુઓ વિષે પણ તમે લોકો આ જન્મમાં ક્યારેય અવાજ ઉઠાવશો ખરા?' 'તમારા જેવા લોકોને કારણે જ આપણા દેશની છાપ ખરડાઈ રહી છે. આજે કોઈ પણ વ્યક્તિ સરકાર કે શાસક પક્ષ વિરુદ્ધ અવાજ ઉઠાવે તો તેના જીવ સામે ખતરો ઊભો થઈ જાય છે. તમારા જેવા 'ભક્તો'ને કારણે જ આ દેશમા અસહિષ્ણુતા ફેલાઈ ગઈ છે. તમારા પ્રિય પક્ષની સરકાર આવી એ પછી વાતો કરવા સિવાય શું કર્યું છે આજ સુધી તમે લોકોએ?' એક દાઢીધારી વિદ્વાન ઉશ્કેરાઈ ગયા. યજમાન વિદ્વાન હસ્યા. તેમણે કહ્યું: 'તમે આ દેશને ૬૫ વર્ષ સુધી લૂંટ્યો છે, અમારી સરકારને ૬૫ મહિના તો આપો.' 'દેશને લૂંટવા માટે?' બીજા એક વિદ્વાન વચ્ચે ઠેકી પડ્યા. પછી ત્યાં 'અસહિષ્ણુતા', 'ભક્તો' અને 'ગદ્દારો' જેવા શબ્દો સાથે જે ગાલીપ્રદાન શરૂ થયું એ જોઈ-સાંભળીને અબુધ માણસ હેબતાઈ ગયો.   અબુધ માણસને રાજકીય પક્ષોના કાર્યકરો વચ્ચે પહોંચી ગયો. એ બધા પ્રેમથી સાથે બેસીને દારૂ પી રહ્યા હતા. અબુધ માણસને લાગ્યું કે પેલા વિદ્વાન લેખકો કરતાં તો આ રાજકીય કાર્યકરો વધુ સમજુ છે. કેટલા પ્રેમથી એકબીજાના પેગ બનાવી રહ્યા છે! એ બધા વચ્ચે અલકમલકની વાતો થતી હતી. શાસક પક્ષના એક કાર્યકરે કહ્યું, 'જોયુંને સાહેબે કેવો સોપો પાડી દીધો છે. દેશમાંથી ભ્રષ્ટાચારનું નામોનિશાન મિટાવી દીધું.' વિપક્ષના કાર્યકરે કહ્યું, 'રહેવા દે. તને ને મને બંનેને ખબર છે કે ક્યાં શું ચાલે છે! તમારા સાહેબ હાકલા પડકારા કરવામાં જ ઉસ્તાદ છે. પાકિસ્તાનને પાઠ ભણાવવાની વાતો કરતા હતા અને હવે સાડીઓ ને શાલોની આપ-લેનો વહેવાર ચલાવે છે!'   'સાહેબ જે કરે છે એ દેશના ભલા માટે જ કરે છે.' 'હા. એટલે જ તો પાકિસ્તાનમાં પેટ્રોલ ૨૬ રૂપિયે લિટર વેચાય છે અને આપણે ત્યાં એનાથી અઢી ગણી કિંમતે પેટ્રોલ વેચાય છે!' 'આ બધી તમારી લોકોની સત્તાથી દૂર થવાની બળતરા છે બીજું કંઈ નથી! સાહેબનો કરિશ્મા જો. જ્યાં જાય ત્યાં લાખો લોકો ભેગા થઈ જાય છે.' 'હા, દિલ્હી અને બિહારમાં જોયોને કરિશ્મા!' 'સાલા દેશદ્રોહી. તમને બધાને ખબર છે કે સાહેબ શું કરી રહ્યા છે પણ...' 'હા, બરાબર ખબર છે.' 'મોઢું સંભાળીને બોલજે...' 'તારી તો...' આ વખતે અબુધ માણસે ત્યાં થોડી વધુ વાર રોકાવાનું નક્કી કર્યું. થોડી મિનિટમાં એ બધા ફરી હસીમજાક કરી રહ્યા હતા અને એકબીજાને બેફામ ગાળો આપનારા પેલા બન્ને પ્રેમથી ડ્રિંક લેતાં લેતાં કોઈ મિનિસ્ટર પાસે એક ફાઇલ ક્લિયર કરાવવા વિષે વાતો કરી રહ્યા હતા. અબુધ માણસ અવાક્ બની ગયો. તે પેલી જગ્યાએ પહોંચી ગયો, જ્યાં તેની મુલાકાત ઉપરવાળા સાથે થઈ ગઈ હતી. તે ત્યાં એક દીવાલમાં માથા પછાડવા લાગ્યો. ઉપરવાળો પ્રગટ થયો. તેણે પૂછ્યું: 'શું થયું?' અબુધ ભારતીય નાગરિકે કહ્યું: 'તમારું વરદાન પાછું ખેંચી લો અને મેં જે જોયું-સાંભળ્યું છે એ બધું મારા મગજમાંથી ભૂંસી નાખો. આ વરદાનથી તો હું જિંદગીભર રિબાતો રહીશ. મને અબુધ જ રાખો, એક ભ્રમણા અને ઠગારી આશા સાથે હું આખી જિંદગી વિતાવી દઈશ!'  બોટમલાઇન:'બોલકા સેક્યુલર્સને અને બૌદ્ધિકોને ગુજરાતના દલિતો અને ખેડૂતો માટે કેમ નહીં લાગી આવતું હોય?' 'એસ.એસ.સી.ની પરીક્ષામાં નાપાસ થયેલા વિદ્યાર્થીઓ એક તળાવમાં પડીને આપઘાત કરતા હતા. એવા કિસ્સાઓ વધવા લાગ્યા ત્યારે ત્યાં બે પોલીસ કોન્સ્ટેબલને એવી તાકીદ સાથે ફરજ પર મૂકી દેવાયા કે એસ.એસ.સી.ના વિદ્યાર્થીઓને આપઘાત કરતા અટકાવવાના છે.' 'જુઓ, આને ચડી ગઈ છે! હું શું પૂછું છું અને એ જવાબ શું આપે છે!' 'પૂરી વાત તો સાંભળી લો! એક દિવસ એક યુવાન એ તળાવમાં આપઘાત કરવા જતો હતો ત્યાં પેલા બંને પોલીસ કોન્સ્ટેબલે તેને બોચીએથી ઝાલ્યો અને કહ્યું કે અમે તને આત્મહત્યા નહીં કરવા દઈએ, એસ.એસ.સીના વિદ્યાર્થીઓને આપઘાત કરતાં અટકાવવાની ફરજ અમને સોંપાઈ છે.' અરે! પણ હું તો કોલેજના છેલ્લા વર્ષમાં ફેલ થયો છું!' પેલા યુવાને કહ્યું. 'તો વાંધો નહીં. અમે તને નહીં રોકી શકીએ.' પેલા બંને કોન્સ્ટેબલે તેને છોડી દેતાં કહ્યું.

__._,_.___

---

Posted by: Bhupendra Jesrani <jesranibd@yahoo.co.in>

---

Reply via web post

•

Reply to sender

•

Reply to group

•

Start a New Topic

•

Messages in this topic (1)

World&#39;s Best forwarded emails...

Spread a word to join amdavadis4ever-subscribe@yahoogroups.com

To translate the posted material into your native/regional language,
please visit http://translate.google.com/

Like us on facebook: amdavadi amdavadi

Visit Your Group

• New Members 59

• Privacy • Unsubscribe • Terms of Use

.

__,_._,___