to translate this article to Language of your choice.

હેમલ રોજ કરતાં આજે સવારે વહેલો ઊઠી ગયો. વહેલી પરોઢના આકાશના આછા કુમળા ઉજાસે એના બેડરૂમની બારી પાસે આવી જાણે એના કાનમાં મીઠો ટહુકો કર્યો,"આજે તો વસંત-પંચમી, વહેલા ઊઠી જાવ, મેરેજની ઍનિવર્સરી તો ઊજવો. એણે નમિતાના ચહેરા સામે જોયું. એ તો ઘસઘસાટ ઊંઘતી હતી.

રોજ તો એના કરતાં વહેલી ઊઠી જતી હતી. ઊગતા સૂર્યની કૂણી કૂણી ટશરોથી રેલાતું રતૂંબડું અજવાળું-ઊજરડું એના ચહેરા પર જોવાની એને ઘણી મજા પડી. નિદ્રાધીન રૂપાળી પત્નીનો ચહેરો ને એના હોઠ પર મરકતું મધુર સ્મિત ફક્ત એ એકલો, એનો પ્રિયતમ પતિ જ જોઇ શકતો હતો એ ખ્યાલથી એ વધારે રોમાંચિત થયો.

એ ચૂપચાપ બારી પાસે ગયો. સામે નાનાં-મોટાં બધાં વૃક્ષો એમનાં ફૂલોનો વૈભવ પ્રસારી, એમની ઘટા ફેલાવી પ્રસન્નતાથી લહેરાતાં હતાં ને જાણે આજે ખાસ બારી પાસે વધારે ઝૂકી આવ્યાં હતાં.

કંપાઉન્ડના કોટને ફરતે ફરતે એણે નજર ફેરવી. હવે તો ચીકુ, દાડમ ને પપૈયા પાકવા આવ્યા હતાં. નમિતાને ચીકુ ને પપૈયા બહુ ભાવતા હતા ને એને દાડમ. આ સામે હવે તો કેરડો પણ પૂરેપૂરો પાંગર્યો હતો, મ્હોર્યો હતો ને એમાં તો પંખીઓનાં ઝૂમખે ઝૂમખાં ટોળે વળ્યાં હતાં ને એમનો કિલકિલાટ શરૂ કરી દીધો હતો. એમના માળી રામરતને એને કાલે જ કહ્યું હતું કે ચકલીઓ, કબૂતર અને એમનાં કંપાઉન્ડના બાગમાં હમણાં હમણાંથી નવા આવતા પંખી મુનિયાએ તો એમનાં બચ્ચાં ઉછેરવાનું શરૂ પણ કરી દીધું છે અને અબાબીલનાં બચ્ચાં તો માળો છોડીને ઊડી પણ ગયાં.

એને યાદ આવ્યું. ગઇ વસંતપંચમીએ, એમની ચોથી લગ્નતિથિએ બંને એ બહાર ડિનર પર જતાં પહેલાં બાગનાં વૃક્ષો પાછળથી મહા સુદ પાંચમનો ઊગતો ચંદ્ર પણ જોયો હતો.

- ત્યાં તો નમિતાએ આંખો ખોલી. હજુ ઊંઘમાં હતી. એનાં અર્ધ-ખૂલ્યાં કુમળાં પોપચાં પર જાણે નાજુક પતંગિયા આવીને બેસી ગયાં હતાં. એ ઉછાળ કૂદકો લગાવી જોશભેર એની પાસે ગયો ને ઉમળકાથી બોલી ઊઠ્યો, " ઊઠ ઉઠ, જલદી ઊઠ, આજે તો વસંતપંચમી ને એમાંય આપણી લગ્ન-તિથિનો, મૅરેજ-ઍનિવર્સરીનો તો પંચમ સૂર.

આમ કહી નમિતાને દૃઢ પ્રબળ આલિંગનમાં લઇ ગાલ પર વહાલથી ચૂંબન કરવા ગયો, ત્યાં તો આંખો પટપટાવી નમિતા ધીમેથી, લજ્જાથી બોલી,"આપણાં લગ્ન તો નમતી સાંજે થયાં હતાં એટલે મૅરેજ-ઍનિવર્સરી તો એ પછી રાતે જ ઉજવાય... ને હેમલ કશું કહે એ પહેલાં તો બ્રશ કરવા દોડી ગઇ.

એ ડાઈનિંગ ટેબલ પાસે ગયો. આજે તો મમ્મી અને પપ્પા પણ બહુ ખુશ હતાં. બંનેએ હેપી મૅરેજ-ઍનિવર્સરી વિશ કરી.

જલદી જલદી ચા-નાસ્તો પૂરો કરી હેમલે પોતે નાહી લીધું અને શેરવાની પહેરી તૈયાર પણ થઇ ગયો. પછી પળે પળે ક્ષણે ક્ષણે એ નમિતાની રાહ જોવા લાગ્યો. એ આવે ત્યાં સુધી એ મૅરેજના ફોટોગ્રાફ્સનું આલ્બમ લઇ રસપૂર્વક જોવા લાગ્યો-વારંવાર જોયા છતાંય જાણે પહેલી જ વાર જોતો હતો, ત્યાં તો નમિતા હળવા દબાતા પગલે આવી એની સામે ઊભી રહી. એનું સદ્ય-સ્નાતા-નેહ-નમણું રૂપ એ મુગ્ધ પ્રસન્ન દૃષ્ટિએ જોઇ જ રહ્યો. મૅરેજ-ઍનિવર્સરીના ખાસ સાજ-શણગાર અને સુંદર કંચન-રાતી રેશમી સાડીમાં એ અત્યારે ખૂબ જ કામણગારી અને જાજરમાન લાગતી હતી. ડ્રેસિંગ-ટેબલ પાસે એના આછા તેજમાં એનું ઝમકાળું રૂપ ચમક ચમક થતું હતું.

એ કશું કહેવા જતો હતો ત્યાં તો નમિતા પાસે આવી એને પગે લાગવા નીચે નમી. હેમલે તરત જ એના બે હાથ પકડી લીધા અને બોલી ઊઠ્યો,"ના ના, મને નહિ, ચાલ પહેલાં પપ્પા-મમ્મીને પગે લાગીએ. આજે તો પપ્પા પણ બહુ ખુશ છે.

શ્રીપદરાય પણ એમની જ રાહ જોતા હતા. એ વહેલા વહેલા તૈયાર થઇ ડ્રોેઇંગ-રૂમમાં બેઠા હતા. વિશાખાબેન પણ તૈયાર થઇ આમતેમ આંટાફેરા કરતાં હતાં. નમિતા અને હેમલ પહેલાં શ્રીપદરાયને પગે લાગવા ગયાં ત્યાં તો એ પણ બોલી ઊઠ્યા, "ના ના, મને નહિ, ચાલો પહેલાં દિવાકરદાદાને પગે લાગો. સારો-શુભ દિવસ, મંગળ પ્રસંગ આવે એવા એમના આશીર્વાદ લો.

દિવાકરદાદાના મોટા કદના ઑઇલ-પોર્ટ્રેઇટ પાસે ઊભા રહી બંને આંખો મીંચી નતમસ્તક પ્રાંજલભાવે પગે લાગ્યાં. શ્રીપદરાય આર્દ્રભાવે બોલ્યા,"નમિતા, આપણી આ જે કંઇ દોર-દમામ સુખ-સાહ્યબી છે, આ બંગલો-ગાડી છે એમને લીધે છે. એમણે જ ભગીરથ પુરુષાર્થ કરી આપણી આ પેઢી, આપણી આ બધી કેમિકલ્સની અને ફાર્માસ્યુટિકલ્સની કંપનીઓ ઊભી કરી હતી. કશું હતું નહિ પણ એમણે સૌથી પહેલાં મિનરલ્સની કંપની શરૂ કરી આપણી આ જાહોજલાલીનો પાયો નાખ્યો હતો.

જમતી વખતે વિશાખાબેને નમિતાને પગે લાગ્યાનો સાત સેરોવાળો સોનાનો સેટ ભેટ આપ્યો અને પછી એનાં ઓવારણાં લઇ હરખાઇને બોલ્યા,"તું તો અમારા કુટુંબની કુળ-લક્ષ્મી છે. દાદાએ મને કહ્યું હતું કે વહુને પાંચમી લગ્ન-તિથિએ આપણા આ પરિવારની પરંપરાનો સેટ પહેરાવજે. તું હવે અમારા કુળની શોભા વધારજે.

ગ્રાન્ડ ડિનર-પાર્ટી પછી રાતે હેમલે પણી નમિતાને રૂબી અને પોખરાજનો કીમતી હાર ઉમંગ-ઉલ્લાસથી એના ગળામાં પહેરાવ્યો. નમિતા આર્દ્ર અને ભાવવિભોર થઇ એને વળગી પડી અને વહાલથી એના ગાલે ચુંબન કરી લાગણીથી ગદ્ગદ્ થઇ બોલી,"હું તો તને આ જ ભેટ આપી શકું એમ છું. એને પોતાના દૃઢ બાહુપાશમાં લઇ એના મૃદુ-માંસલ ઊભાર તરફ ઝૂકીને આછા કેફ અને તોરમાં એ બોલ્યો, "મારા માટે તો તારો આ ઋજુ ઋજુ ભીનો ભીનો ઉન્મત મદમાતો પ્રેમ જ બહુ છે. મારે બીજું કશું નથી જોઇતું.

નમિતા કશું બોલ્યા વિના પ્રેમભરી અમી નજરે હેમલની આંખોમાં આંખો પરોવી એકીટશે જોઇ રહી, પછી અચાનક ઢીલા નરમ અવાજે બોલી, "હેમુ, તું મને આટલો બધો પ્રેમ કરે છે, આટલી બધી કીમતી ભેટ આપે છે પણ હું તને આપણા બંનેનાં હસીન સપના જેવું, પોચું પોચું કુમળું સુંદર ફૂલગુલાબી બાળક ભેટ નથી આપી શકતી એનું મને બહુ દુ:ખ છે, મારું મન સતત કોચવાયા કરે છે અને-ત્યાં તો એનાં મોં પર હાથ દબાવી એને કશું આગળ ન બોલવા દઇ હેમલે ધીમેથી એના કાનમાં લાગણીભર્યા અવાજે કહ્યું,"નિમુ, આજે આપણી મૅરેજ-એનિવર્સરીના દિવસે આવું મનને કલેશ અને સંતાપ થાય એવું ના બોલીશ. મને તો કંઇ એવો સંતાનનો મોહ નથી પણ પપ્પાને મનમાં એવું થયા કરે છે કે હવે ઘરમાં કોઇ પા પા પગલીનો પાડનાર આવે તો સારું, એમનો વંશ ચાલુ રહે, એમની પેઢી આગળ વધે એવી લાગણી એમને હોય એ સ્વાભાવિક છે પણ-

-ત્યાં તો નમિતા પણ કંઇક ઉદાસ, ગમગીન થઇ આગળ બોલી, "હા, મમ્મી પણ દરેક મહિને મારા ચહેરા સામે કંઇક આશાથી, કંઇક અપેક્ષાથી, છાની આતુરતાથી જોયા કરે છે, પછી નિરાશ થઇ જાય છે, કશું બોલતાં નથી પણ એમની આંખોમાં છુપાયેલી એમની હતાશા હું જોઇ શકું છું. પછી બોલતાં બોલતાં એ રડી પડી. હેમલ મૂંગો મૂંગો એની પીઠ પસવારવા લાગ્યો. નમિતાનાં ધીમા છાનાં ડૂસકાં એને સંભળાતા હતાં.

થોડાક દિવસ પછી રવિવારે નમતી સાંજે બધાં ડાઇનિંગ ટેબલ પર ચા પીતાં પીતાં નિરાંતે હળવી વાતો કરતાં બેઠા હતાં ત્યાં અચાનક અણધાર્યો વિસ્ફોટ થયો. નમિતાએ એકાએક ગંભીર થઇ ઓચિંતું જ સીધું શ્રીપદરાયને કહ્યું, "પપ્પાજી, છેલ્લા કેટલાય દિવસથી મારા મનમાં એક વાત ઘુમરાયા કરે છે. ઘણું કરું છું પણ મન શાંત થતું નથી, વલોવાયા કરે છે, એટલે આજે અત્યારે આપણે બધાં સાથે બેઠાં છીએ એટલે કહી જ દઉં છું, માઠું ના લગાડશો, પણ હવે કાબૂ નથી રાખી શકતી. આમ વાત મારી છે છતાંય આપણાં બધાંની છે. અમારાં લગ્ન થયે પાંચ વર્ષ થઇ ગયાં, પરંતુ હજુ સુધી હું આપણા આટલા મોટા ખાનદાન કુટુંબના વારસદારને જન્મ આપી શકી નથી. આપણી ઘણી બધી મોટી કંપનીઓ છે, બહોળો બિઝનેસ છે, અઢળક સંપત્તિ છે એટલે એ સંભાળવા માટે, સાચવવા માટે, પેઢીને આગળ વધારવા માટે આ પરિવારમાં પારણું તો બંધાવવું જ જોઇએ, એટલે ઘણો બધો વિચાર કર્યા પછી હું તમને બધાંને હાથ જોડીને ખાસ ભારપૂર્વક વિનંતી કરું છું કે મને છૂટાછેડા, ડાઇવૉર્સ આપી, બીજાં લગ્ન કરી, બીજી વહુને ઘરમાં લાવો, જેથી આ પરિવારમાં કોઇ પા પા પગલી પાડનારનો, વારસદારનો જન્મ થાય. પ્લીઝ પપ્પા, મને છૂટાછેડા આપી દો, મને કશો વાંધો નથી. મારી રાજીખુશીથી હું આ કહું છું.'

બોલતાં બોલતાં એ ગળગળી થઇ ગઇ. એના હોઠ ને હાથ ધ્રૂજવા માંડ્યા. એની આંખો ભીની થઇ ગઇ.

નમિતાના આ શબ્દોથી એકદમ સન્નાટો છવાઇ ગયો. બધાં સ્તબ્ધ થઇ ગયાં. હેમલને તો ભારે આંચકો અને આઘાત લાગ્યો.

દુ:ખ અને આછા રોષથી એ દિગ્મૂઢ થઇ ગયો. નમિતાએ એને તો પહેલાં આવી કશી છૂટાછેડાની વાત જ કરી નહોતી અને એને પૂછ્યાં-કહ્યા વિના આમ એકાએક પપ્પાને સીધી જ બારોબાર આવી ગંભીર વાત કરી દીધી! એ સમસમી ગયો.

શ્રીપદરાયના મનમાં પણ ખળભળાટ મચી ગયો હતો. છતાંય મન પર સંયમ રાખી, સ્વસ્થ થઇ એમણે શાંતિથી માયાળુપણે નમિતાને કહ્યું, "નમિતા, એવું તે એકાએક શું બની ગયું તે તું અચાનક સીધી છૂટાછેડાની વાત પર આવી ગઇ! કોઇએ તને કશું કહ્યું? નમિતા, તું ગમે તે જવાબ આપે એ પહેલાં મારી એક વાત સાંભળ. ભલે હું હેમલનો પપ્પા છું પણ આમ હું ઉંમરમાં ઘણો નાનો છું. બહુ વહેલી ઉંમરે હેમલ આવી ગયો હતો, કેમ વિશાખા ખરુંને? અમે સાથે બહાર નીકળીએ તો મને કોઇ એનો મોટો ભાઇ કહે. આ વાત તને અત્યારે એટલા માટે કહું છું કે કશો સંકોચ રાખ્યા વિના, કશું એવું ખોટું મારાથી અંતર રાખ્યા વગર નિખાલસપણે તું સાચેસાચું જે હોય તે કહી દે. તેં એકાએક આવી વાત કેમ કરી? તેં હેમલને પૂછ્યું હતું? એણે તને હા પાડી હતી?

નમિતાએ તરત જ અત્યંંત ધીરગંભીરભાવે શાંતિથી જવાબ આપ્યો, "ના, મેં એમને કહ્યું નહોતું કે પૂછ્યું નહોતું. એ કોઇ દિવસ હા ના કહે. કદાચ એ મને માફ નહિ કરે, પણ હું મારા મનના અંતરાત્માને વશ થઇને વર્તી છું. હું તદ્દન સાચું સોગંદપૂર્વક કહું છું કે એવું કશું બન્યું નથી કે કોઇએ મને કશું કહ્યું નથી. પણ આપણે અમુક મહત્ત્વની બાબતોમાં, ગમે કે ના ગમે, વાસ્તવિક વ્યવહારુ વાતનો વિચાર કરવો જોઇએ, કશોક હિંમતભર્યો નિર્ણય પણ કરવો જોઇએ, જો બધાંના હિતમાં હોય તો દુ:ખ થાય તો પણ એનો સ્વીકાર કરવો જોઇએ...પપ્પા, મારી વાત માનો, મને ડાઇવૉર્સ આપી તમારી જ કોઇ કંપનીમાં મને કોઇ સારી સર્વિસ આપજો. મને જુદો નાનકડો ફ્લેટ અપાવજો, બસ! હું એમાં ખુશીથી આનંદપૂર્વક રહીશ.

અત્યાર સુધી શાંત બેઠેલાં વિશાખાબેન ધૂંઆપૂંઆ થઇ બોલી ઊઠ્યાં, "નમિતા, શું જેમ તેમ બોલે છે! તું ગાંડી તો નથી થઇ ગઇને! હેમલ,તું કેમ કશું બોલતો નથી?

કંઇક રોષ અને વેદનાથી થડકાતા અવાજે હેમલે જવાબ આપ્યો, શું બોલું! મને એ જ સમજાતું નથી કે એને આવા વિચારો ક્યાંથી આવ્યા! મને પૂછવું હતું તો ખરું...આનાં કરતાં તો કોઇ બાળકને દત્તક લઇએ તો સારું. વિશાખાબેને પણ તરત જ એના સૂરમાં સૂર પૂરાવ્યો,"હા, હેમલની વાત બરાબર છે, છેવટે કોઇને દત્તક લઇને ખોેળે બેસાડીશું, પેઢીએ તાળું તો ના લાગી જાય, પણ એમ કોને દત્તક લઇશું? નજીકના તમારા સગામાં તો કોઇ છે નહિ, ને એમ કંઇ રસ્તા પરથી કે આશ્રમમાંથી-

એમને અધવચ્ચે જ અટકાવી શ્રીપદરાય સહેજ ચિડાઇને, ધૂંધવાઇને બોલ્યા,"અત્યારે કોઇને દત્તક લેવાની ક્યાં આ અર્થ વગરની વાહિયાત ચર્ચા કરો છો! જો નમિતા, જેમ હેમલ અમારે એકનો એક દીકરો છે એમ હું પણ મારા પપ્પાનો એકનો એક દીકરો છું, મારેય કોઇ ભાઇ-બેન નહિ ને એમ હેમલનેય કોઇ ભાઇ-બેન નથી, એટલે હવે અમે પારકા લોહીને આપણા કુટુંબમાં કે પેઢીમાં-

નમિતા અકળાઇને ઢીલા રડમસ અવાજે વચ્ચે બોલી ઊઠી, 'પણ હું ક્યાં કોઇને દત્તક લેવાની વાત કરું છું! હું તો મારા જ કમનસીબીની વાત કરતી હતી. હું એવું તો કહેતી હતી કે હવે બીજી વહુ લાવો અને ભગવાનની મહેરબાનીથી એની કૂખે તમારા કુટુંબનો ભાગ્યશાળી કુળદીપક, વારસદાર જન્મે તો તમે કહો છો એમ બીજા કોઇનું અજાણ્યું લોહી તમારા ખાનદાનમાં નહીં આવે અને તમારા કુટુંબનો દીવોય જલતો રહેશે અને તમારી પેઢીને ક્યારેય તાળું નહિ લાગી જાય.

શ્રીપદરાય સહેજ નારાજ થઇ સંતાપ અને બળતરાથી તડતડી ઊઠ્યા, "પણ ક્યારનીય તું આ છૂટાછેડાની એકની એક વાત શા માટે કર્યા કરે છે! ને હજુ તો લગ્નને માંડ પાંચ વર્ષ થયાં છે ત્યાં આટલો બધો ઉચાટ અને અધીરાઇ શા માટે!પછી પાછા એકાએક ચહેરાનો ભાવ બદલી હળવાશથી આછું હસીને બોલ્યા, "નમિતા,તું અમારી સામે જો, હજુ તો અમે પણ જુવાનજોધ જેવાં છીએ, ત્યારે તું તો કેટલી નાની કુમળી પાંગરતી વેલ જેવી છે! તેં તો ત્રીસી પણ વટાવી નથી ને તને તો ખબર જ હશે કે ઠેઠ ચાળીસી સુધી બાળકો થાય...પણ નમિતા, આ વાત નીકળી છે તો મારા મનમાં પણ ઘણા સમયથી ચાલતી-ઘુમરાતી એક વાત નિખાલસપણે કહી દઉં? ને આમેય હવે એ વાત કહેવાનો સમય પાકી ગયો છે.

નમિતાએ કુતૂહલથી પૂછ્યું,"એવી તે શી વાત છે પપ્પા? શ્રીપદરાયે વિશાખાબેન ને પછી હેમલની સામે જોઇ ધીમેથી કહ્યું,"જો તને અને હેમલને તો ખબર જ છે કે ટેલિવિઝન ટાવર જતાં પહેલાં સર્કલ પાસે 'પલ્લવ ફર્ટિલિટી સેન્ટર' ચાલે છે. એના ગાયનેકોલોજિસ્ટ ડૉ. યશવંત કોઠારી મને સારી રીતે ઓળખે છે, મારે સારો સંબંધ છે, અમે અવારનવાર કલબમાં મળીએ છીએ, નમિતા, મારી તને એ સલાહ છે કે બીજી કશી ચિંતા કર્યા વિના તું ત્યાં તારી તપાસ, ઍક્ઝામિનેશન કરાવી લે, તને કશો વાંધો તો નથીને?

નમિતાએ નીચું જોઇ મંદ ઢીલા અવાજે જવાબ આપ્યો,"ના ના, મને શો વાંધો હોય, પછી એણે હેમલ સામે જોયું. શ્રીપદરાય એના મનની મૂંઝવણ સમજી ગયા, 'હેમલ, તને પણ કશો વાંધો નથીને?' એણે પણ મોળા નરમ અવાજે જવાબ આપ્યો,"ના ના, મને પણ શો વાંધો હોય. શ્રીપદરાય પછી નિરાંતનો શ્ર્વાસ લઇ વિશાખાબેનની સામે જોઇ ઊભા થતા બોલ્યા, "તો પછી હવે બીજી બધી વાતો બંધ કરી, કશો વિલંબ કર્યા વિના કાલે સાંજે જ એમના સેન્ટર પર જઇ આવો. હું એમને ફોન કરી દઇશ.

એ પ્રમાણે બીજા દિવસે સોમવારે સાંજે હેમલ અને નમિતા 'પલ્લવ ફર્ટિલિટી સેન્ટર' પર ગયાં. નમિતાના મનમાં ઘણો જ ક્ષોભ અને સંકોચ હતો. હેમલ પણ ખાસ કશું બોલતો નહોતો. એક બે વાર ફક્ત એવું બોલ્યો હતો, 'જે થયું એ સારું થયું. હવે જે હશે એની ખબર પડી જશે અને કાયમ માટે ઉકેલ આવી જશે.'

ફર્ટિલિટી સેન્ટર ઘણું જ સ્વચ્છ અને અદ્યતન સાધનોથી સજ્જ હતું. ધાર્યા કરતાં થોડી ઘણી નાની ઉંમરના ડૉ. યશવંત કોઠારી ઘણા જ હસમુખા, હોશિયાર અને નિખાલસ લાગ્યા. એમણે હેમલ અને નમિતાને જાતજાતના મૂંઝવણભર્યા પ્રશ્ર્નો ઘણી જ સાહજિકતાથી અને હળવાશથી પૂછ્યા. જોકે ઘણીવાર સંકોચ વિના છૂટથી એમના અંગત દેહ-સંબંધ અને સહ-શયન વિશે ચોખ્ખેચોખ્ખું પૂછતા હતા અને ક્યારેક તો ધૃષ્ટતાથી જિન્સી સેક્સ્યુઅલ ઇન્ટિમસી અને આર્ટ વિશે ખુલ્લંખુલ્લું બોલતા હતા. નમિતા જવાબ આપતાં શરમાતી હતી. છેવટે એ નમિતાને સોનોગ્રાફી ટેસ્ટ માટે અંદર લેબોરેટરીમાં લઇ ગયા.

હેમલને આ સ્થિતિમાં મુકાવું પડ્યું એટલે મનમાં આ બધું કઢંગું ને ક્ષોભજનક લાગતું હતું. સામે દીવાલ પર સુંદર બાળકોની છબી ટિંગાતી હતી. એમના નિર્દોષ માસૂમ ચહેરા સામે એ જોઇ રહ્યો.

થોડીવાર પછી ડૉ. યશવંત કોઠારી લેબોરેટરી રૂમમાંથી બહાર આવ્યા. એમની પાછળ પાછળ નમિતા પણ ધીમા દબાતા પગલે હેમલની પાસે આવી, એની બાજુમાં બેસી ડૉક્ટરની સામે આતુરતાપૂર્વક જોઇ રહી. બંનેની સામે આછું સ્મિત કરી ડૉ. કોઠારીએ એમને કહ્યું,"એમને તો બધું નોર્મલ છે. કશું ચિંતા કરવા જેવું નથી, પણ ઋતુ-સમય પછી તરત જ તમારે આવવું પડશે. એ વખતે સોનોગ્રાફીમાં ઑવમ વિશે જોઇ લઇશું, પછી રિપોર્ટ સોએ સો ટકા પાકો. હું શ્રીપદરાયને ફોન કરી દઇશ.

__._,_.___

Posted by: Bhupendra Jesrani <jesranibd@yahoo.co.in>

Reply via web post

•

Reply to sender

•

Reply to group

•

Start a New Topic

•

Messages in this topic (1)

Have you tried the highest rated email app?

With 4.5 stars in iTunes, the Yahoo Mail app is the highest rated email app on the market. What are you waiting for? Now you can access all your inboxes (Gmail, Outlook, AOL and more) in one place. Never delete an email again with 1000GB of free cloud storage.

World's Best forwarded emails...

Spread a word to join amdavadis4ever-subscribe@yahoogroups.com

To translate the posted material into your native/regional language,
please visit http://translate.google.com/

Like us on facebook: amdavadi amdavadi

Visit Your Group