[amdavadis4ever] પૈસા નથી, છૂટા નથી, કરવું શું? એક ગૃહિણી

 

Please use http://translate.google.com/ to translate this article to Language of your choice. પૈસા નથી, છૂટા નથી, કરવું શું?  એક ગૃહિણી સિક્રેટ ડાયરી - નિખિલ મહેતા ચૂંટણીઓ વખતે નરેન્દ્રભાઇ મોદીએ દેશના દરેક નાગરિકના બેન્ક ખાતામાં પંદર લાખ રૂપિયા જમા કરાવવાનું વચન આપ્યું હતું ત્યારે હું તો બહુ ખુશ થઇ ગઇ હતી. અમારા ઘરના સૌએ નરેન્દ્રભાઇના પક્ષને મત આપ્યો એટલું જ નહીં, નરેન્દ્રભાઇનો એક ફોટો પણ અમારી રૂમમાં લટકાવ્યો હતો. એ ફોટો મારા સસરાના ફોટાની બાજુમાં ટીંગાડ્યો ત્યારે મિસ્ટરે થોડો વાંધો ઉઠાવ્યો હતો, પરંતુ હું મક્કમ રહી. નરેન્દ્રભાઇના ફોટાને રોજ પગે લાગવાનું પણ હું છોકરાવને કહેતી હોઉં છું અને એની સામેય મિસ્ટર ક્યારેક વાંધો ઉઠાવતા હોય છે, પણ હું મક્કમ રહું છું. આમેય આ જગતમાં ધણીનું ધાર્યું ક્યાં કદી થતું હોય છે? નરેન્દ્રભાઇ વડા પ્રધાન બન્યા પછી વારંવાર વિદેશ પ્રવાસે જાય છે ત્યારે મને એમ જ લાગે છે કે તેઓ આપણા સૌ માટે કાળું નાણું કઢાવવા જ જાય છે. આથી જ તેઓ જ્યારે વિદેશ જાય ત્યારે હું તો એમની સલામતી માટે અને અમારા આર્થિક ઉદ્ધાર માટે પ્રાર્થના કરતી રહું છું. હવે નરેન્દ્રભાઇ આખી દુનિયા ફરી આવ્યા છતાં આપણા પૈસા પાછા આવ્યા નથી એટલે મને થોડી ચિંતા થઇ અને મેં એ વિશે મિસ્ટરને પૂછ્યું તો એમણે ઉડાઉ જવાબ આપ્યો. એ વિશે વધુ ચિંતા કરું એ પહેલા આ મોટી આફત આવી પડી. પાંચસો અને હજાર રૂપિયાની નોટો રાતોરાત બંધ થઇ. પહેલા તો બધા ખુશ થઇ ગયા હતા, પણ પછી ધીમે ધીમે આવનારી તકલીફના વિચાર આવ્યા અને બધા મનમાં મૂંઝાવા માંડ્યા. મેં મિસ્ટરથી છુપાવીને જે બાર હજાર રૂપિયા જમા કર્યા હતા એનું શું કરવું એ સમજાતું નહોતું. મિસ્ટરને કહેવાય નહીં અને બેન્કના વહીવટની આપણને ખાસ ખબર ન પડે. પછી એક આઇડિયા કર્યો. મારી ફ્રેન્ડ સોનાલીના બાર હજાર રૂપિયા જૂની નોટોમાં રહી ગયા છે એવું કહીને મિસ્ટરની ઓળખાણનો ઉપયોગ કરીને એ નોટ એક્સચેન્જ કરાવી લીધી. આમેય મિસ્ટરને મારી બધી ફ્રેન્ડ્સ માટે સોફ્ટ કોર્નર એટલે એમના નામે બધા કામ થઇ જાય. ઘરમાં પહેલેથી એવી પ્રથા છે કે બેન્કનું બધું કામકાજ મિસ્ટર સંભાળે અને કેશનો કારભાર મારા હાથમાં. છેલ્લા થોડા દિવસોથી સ્થિતિ બદલાઇ ગઇ છે. મિસ્ટર પાસે કેશ ખૂટી ગયા છે અને બેન્કની લાઇનમાં ઊભા રહેવાનો એમની પાસે સમય નથી. આથી ઘરનો વહીવટ ચલાવવાની અને એ માટે જરૂરી રોકડા લાવવાની જવાબદારી મારા માથે આવી ગઇ છે. મિસ્ટર પાસેથી બેન્કની કામગીરીને લગતી થોડી જાણકારી મેળવી લીધી અને પછી બેન્ક બહારની લાઇનોમાં ઊભા રહેવાનું શરૂ કરી દીધું. ઇલેક્ટ્રિક બિલ ભરવા, સુપર માર્કેટની શોપિંગમાં કે ફિલ્મના એડવાન્સ બુકિંગની નાની નાની લાઇનમાં ઊભા રહેવાનો મને અનુભવ હતો, પણ આવી મોટી લાઇનમાં હું ક્યારેય ઊભી નહોતી. આથી શરૂઆતમાં બહુ તકલીફ પડી. બે ત્રણ કલાક સુધી લાઇનમાં ઊભા રહેવા માટે તાકાત જોઇએ, પણ અમારા પડોશી કહેતા હોય છે કે દિલમાં દેશભક્તિનો જુસ્સો હોય તો બેન્ક બહારની લાઇનમાં ઊભા રહેવાની તાકાત શરીરમાં આપોઆપ આવી જાય. અમારી સોસાયટીમાં તો હવે શિરસ્તો પડી ગયો છે. દિવસે બેન્ક તથા એટીએમની લાઇનમાં ઊભા રહેવાનું અને રાત્રે નોટબંધી વિશેની ચર્ચા કરવાની. નોટબંધી બાબતે નરેન્દ્ર મોદીને સપોર્ટ કરનારા અને એનો વિરોધ કરનારા બન્ને પ્રકારના લોકો ચારે તરફ જોવા મળે છે. મને પહેલા તો આવી બાબતોમાં કશી ખબર નહોતી પડતી, પણ પછી વિચાર્યું કે જિંદગીનો અમુક હિસ્સો જો બેન્કની લાઇનમાં જ પસાર થવાનો હોય તો આ વિશેની વધુ જાણકારી મેળવી લેવી જોઇએ. આથી હું તો હંમેશાં બન્ને તરફની દલીલો ધ્યાનપૂર્વક સાંભળું છું અને એના મુખ્ય મુદ્દા ગોખી લઉં છું. પછી આ મુદ્દાનો ઉપયોગ હું લાઇનમાં ખોટી રીતે ઘૂસવા માટે કરું છું.  ખરેખર તો પહેલા દિવસે એક મોટી લાઇનમાં ચાર કલાક ઊભી રહીને હું કંટાળી ગઇ હતી એટલે લાઇનમાં વધુ ઊભા ન રહેવું પડે એ માટેની યુક્તિઓ હું હંમેશાં શોધતી રહું છું. એકબે વાર એવું બન્યું કે એક મોટી લાઇનમાં ઊભેલા માણસો નોટબંધી વિશે ચર્ચા કરી રહ્યા હતા. એક સદ્ગૃહસ્થ જોરશોરથી નરેન્દ્ર મોદીની ટીકા કરી રહ્યા હતા. એવામાં બે યુવાનોએ એમને પડકાર્યા અને કહ્યું કે દેશ કે લિયે આપ ઇતના નહીં કર સકતે હો ક્યા? તક જોઇને હું લાઇનમાં ઘૂસી ગઇ અને પેલા સદ્ગૃહસ્થને કહ્યું કે નરેન્દ્ર મોદી જો કરતે હૈ વો સબ હમારે લિયે હી કરતે હૈ. દેખો. દેશ કે લિયે ઉન્હોને સબ કુછ છોડ દિયા. પેલા બે યુવાનો જોશમાં આવી ગયા અને નવી દલીલો કરવા માંડ્યા. મને લાઇનમાં ઘૂસેલી જોઇને પાછળ ઊભેલા એકબે જણાએ બૂમાબૂમ કરી, પણ પેલા યુવાનો મારી મદદે આવ્યા. સૌને ચૂપ કરી દેતાં એમણે કહ્યું કે 'આન્ટી હમ કો બોલ કર બાહર ગયા હતા.' આવી જ રીતે એક વાર મેં નરેન્દ્ર મોદીની ટીકા કરતા કરતાં લાઇનમાં ઘૂસણખોરી કરી હતી, કારણ કે ક્રાઉડમાં મોટા ભાગના મોદીવિરોધીઓ હતા. નોટબંધીથી ફાયદો થશે કે નહીં, પણ એ વિશેની જાણકારી રાખવાની મને તો આવો ફાયદો જરૂર થયો. જોકે આવી તરકીબો બેચાર વાર કામ લાગી, પછી લોકો મને ઓળખી ગયા અને હું કંઇ બોલું એ પહેલા જ બૂમાબૂમ શરૂ દેવા લાગ્યા. છેલ્લા કેટલાક દિવસોથી અમે એક નવી સંસ્કારી તરકીબ શરૂ કરી છે. અમે ચાર પાંચ મહિલા બેન્કની લાઇનમાં ઊભા રહેવાના વારા રાખ્યા છે. એક બહેન કેશભરેલા એટીએમની તપાસ કરતી રહે, બીજી બહેન લાઇનમાં ઊભી રહે, ત્રીજી બહેન નાસ્તા લાવે. નંબર જેવો નજીક આવે કે તરત લાઇનમાં ઊભી રહેલી બહેન બાકીની સાથીદારોને મોબાઇલ કરીને લાઇનમાં બોલાવી લે. એક તરફ આપણે આવી હાડમારી વેઠી રહ્યા હોઇએ અને બીજા દિવસે છાપાંમાં એવા સમાચાર વાંચવા મળે કે કોઇ કાળાંબજારિયાએ કરોડો રૂપિયાની નોટો નદીમાં વહાવી દીધી અથવા કચરામાં નાંખી દીધી અથવા બાળી નાંખી. મારો તો જીવ બળી ગયો આવા સમાચાર વાંચીને. એક દિવસ તો સવારના પહોરમાં કોઇને કહ્યા વિના ઘરની બહાર નીકળી ગઇ અને આસપાસના બધા ઊકરડામાં ફરી વળી. ગંદા પાણીના નાળામાં પણ તપાસ કરી. ક્યાંય નોટોની થપ્પીઓ ન મળી. એક ઉકરડામાં કાગળિયાં બળતાં જોયાં. અડધાં બળેલાં કાગળિયાં ખંખેરીને મેં ધ્યાનથી જોયાં તો એ જાણીતા લેખકોનાં પુસ્તકોનાં પાનાં નીકળ્યાં. બાકીનાં કેટલાંક છાપાંની પૂર્તિનાં હતાં. નિરાશ થઇને ઘરે પાછી ફરી તો સૌ ચિંતિત હતા. મેં ખુલાસો કરતાં કહ્યું કે દૂધની લાઇન જરા લાંબી હતી. નરેન્દ્રભાઇએ તો ખરેખર દુ:ખી કરી નાંખ્યા છે. મિસ્ટરે પણ બધી જવાબદારી મારા માથે નાંખી દીધી છે. આવા સંજોગોમાં ઘર કેવી રીતે ચલાવવું એ મારું જ મન જાણે છે. શાકવાળા બે હજારના છૂટા આપવાની ના પાડે છે. કેટલાક પાસે ખરેખર છૂટા નથી હોતા તો બીજા કેટલાકને બે હજારની નોટનો દેખાવ નથી ગમતો. પાણીપૂરીવાળો ભૈયો પણ શાણો છે. ગઇકાલે મેં એને બે હજારની નોટ આપી તો છૂટા પાછા આપવાની ના પાડતા કહેવા લાગ્યો કે જમા રાખો. બે હજાર પૂરા થાય ત્યાં સુધી પાણીપૂરી ખાતા રહેજો. હું ડબલ શાણી છું. મેં એને કહ્યું કે મારી પાસે પૈસા આવે ત્યાં સુધી ઉધારીમાં ખવરાવતો રહે. ચલ, અત્યારે એક વધારાની મસાલા પૂરી આપ. મોટાં બિલ ચેકમાં ભરી શકાય, પણ રોકડાની ખરીદી માટે હાથમાં પૈસા તો જોઇએને. કોઇની પાસે પૈસા નથી. પહેલા જેવી હવે છૂટ નથી રહી. અમારી કિટી પાર્ટીની વિશીની પણ હાલત ખરાબ છે. વિશીમાં બધા જૂની નોટ કાઢે છે એટલે કોઇ વિશી ઉપાડવા નથી માંગતું. ગયા મહિને એમ જ બધા નાસ્તો કરીને છૂટા પડ્યા. વિશીમાં નવી નોટો આવે એની બધા રાહ જોઇ રહ્યા છે.  હવે હાલત એવી થઇ ગઇ છે કે અત્યંત જરૂરી હોય એની જ ખરીદી કરું છું. મોજમજાનાં ખર્ચા બધા બંધ છે. રોજેરોજ એટીએમની લાઇનમાં ઊભા રહેવાનું ટેન્શન તો લટકતું જ રહે છે. કોને ખબર, ક્યારે અંત આવશે આ હાડમારીનો. ક્યારેક રડવું આવી જાય છે, પરંતુ નરેન્દ્રભાઇને ટીવી પર રડતા જોઇને અટકી જવાય છે.  ગઇ કાલે રાત્રે સૂવા ગઇ ત્યારે ખૂબ થાકેલી હતી એટલે નરેન્દ્ર મોદી યાદ આવ્યા. મેં એમને મનોમન પ્રાર્થના કરી કે, 'હે વડા પ્રધાનશ્રી, અમને પદ્મશ્રી કે પદ્મભૂષણ નથી જોઇતો. પણ અમારા જેવી ગૃહિણીઓ જે રીતે રોજિંદા જીવનમાં સંઘર્ષ કરી રહી છે એ બદલ શક્ય હોય તો ૨૬મી જાન્યુઆરીએ અમને સૌને બહાદુરીનો કોઇ ચન્દ્રક જરૂર આપજો.'  (નિખિલ મહેતાએ કરેલી કલ્પના)

__._,_.___

---

Posted by: Bhupendra Jesrani <jesranibd@yahoo.co.in>

---

Reply via web post

•

Reply to sender

•

Reply to group

•

Start a New Topic

•

Messages in this topic (1)

---

Have you tried the highest rated email app?

With 4.5 stars in iTunes, the Yahoo Mail app is the highest rated email app on the market. What are you waiting for? Now you can access all your inboxes (Gmail, Outlook, AOL and more) in one place. Never delete an email again with 1000GB of free cloud storage.

---

World&#39;s Best forwarded emails...

Spread a word to join amdavadis4ever-subscribe@yahoogroups.com

To translate the posted material into your native/regional language,
please visit http://translate.google.com/

Like us on facebook: amdavadi amdavadi

Visit Your Group

• New Members 31

• Privacy • Unsubscribe • Terms of Use

.

__,_._,___